നെടുങ്കണ്ടത്ത് ലൈംഗികാതിക്രമം ചെറുത്ത യുവതിയെ വെട്ടി കൊലപ്പെടുത്താൻ ശ്രമം; യുവാവ് പിടിയിൽ
പെൺകുട്ടിയുടെ കൈക്കും നെറ്റിയ്ക്കുമാണ് വെട്ടേറ്റത്. ആക്രമണത്തിൽ കൈ ഞരമ്പുകള്‍ മുറിഞ്ഞു.
ഇടുക്കി : നെടുങ്കണ്ടം മുണ്ടിയെരുമയിൽ പെൺകുട്ടിയെ വീട്ടിൽ കയറി ആക്രമിച്ചു. ലഹരിക്ക് അടിമയായ യുവാവ് വീട്ടിൽ കയറി പെൺകുട്ടിയെ വെട്ടി കൊലപ്പെടുത്താൻ ശ്രമിക്കുകയായിരുന്നു. പരിക്കേറ്റ മുണ്ടിയെരുമ ദേവഗിരി സ്വദേശിനിയായ യുവതിയെ തേനി മെഡിക്കൽ കോളേജിൽ ചികിത്സയിൽ. പാമ്പാടുംപാറ സ്വദേശി കളിവിലാസം വിജിത്ത് ആണ് ആക്രമണം നടത്തിയത്.
ലഹരി ഉപയോഗിച്ചെത്തിയ ഇയാള്‍ യുവതിയുടെ വീട്ടിൽ അതിക്രമിച്ചു കയറുകയുകയായിരുന്നു. ഈ സമയം പെണ്‍കുട്ടി മാത്രമായിരുന്നു വീട്ടീൽ ഉണ്ടായിരുന്നത്. യുവതിക്ക് നേരെ ലൈംഗികാതിക്രമത്തിനായി ശ്രമിക്കുന്നതിനിടയില്‍ കുതറി മാറിയപ്പോൾ വാക്കത്തികൊണ്ട് യുവാവ് വെട്ടിപരിക്കേല്‍പ്പിക്കുകയായിരുന്നു. പെൺകുട്ടിയുടെ കൈക്കും നെറ്റിയ്ക്കുമാണ് വെട്ടേറ്റത്. ആക്രമണത്തിൽ കൈ ഞരമ്പുകള്‍ മുറിഞ്ഞു.
തുടർന്ന് പുറത്തേക്ക് ഓടി രക്ഷപ്പെട്ട പെൺകുട്ടിയെ പ്രതി പിന്തുടർന്നു. നിലവിളി കേട്ടെത്തിയ നാട്ടുകാരാണ് പെൺകുട്ടിയെ രക്ഷപ്പെടുത്തിയത്. നാട്ടുകാർ പ്രതിയെ തടഞ്ഞു വെക്കുകയും നെടുങ്കണ്ടം പോലീസിൽ അറിയിക്കുകയുമായിരുന്നു. പ്രതി മുമ്പും പെൺകുട്ടിയെ ആക്രമിക്കുവാൻ ശ്രമിച്ചിരുന്നതായി ബന്ധുക്കൾ പറഞ്ഞു. ഈ കേസില്‍ ശിക്ഷ അനുഭവിച്ചിട്ടുള്ളയാളാണ് പ്രതി.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...