Hypertension Diet: ഹൈപ്പർടെൻഷൻ കുറയ്ക്കാൻ ഈ ഭക്ഷണങ്ങൾ മറക്കാതെ കഴിക്കാം
Blood Pressure: ഒരു കാലത്ത് പ്രായമായവരിൽ മാത്രം ഉണ്ടാകുന്ന ആരോഗ്യപ്രശ്നമായി കണക്കാക്കപ്പെട്ടിരുന്ന രക്തസമ്മർദ്ദം ഇന്ന് യുവാക്കളിൽ പോലും ഒരു സാധാരണ പ്രശ്നമായി മാറിയിരിക്കുന്നു.
ഹൈപ്പർടെൻഷൻ സമീപകാലത്തായി ഭൂരിഭാഗം ആളുകളെയും ബാധിക്കുന്ന ഒരു ആരോഗ്യപ്രശ്നമായി മാറിയിരിക്കുകയാണ്. ഉദാസീനമായ ജീവിതശൈലിയുടെ ഫലമായി മുപ്പതുകളിൽ പോലും രക്തസമ്മർദ്ദ പ്രശ്നങ്ങൾ ഉണ്ടാകാൻ തുടങ്ങിയിരിക്കുന്നു. ഒരു കാലത്ത് പ്രായമായവരിൽ മാത്രം ഉണ്ടാകുന്ന ആരോഗ്യപ്രശ്നമായി കണക്കാക്കപ്പെട്ടിരുന്ന രക്തസമ്മർദ്ദം ഇന്ന് യുവാക്കളിൽ പോലും ഒരു സാധാരണ പ്രശ്നമായി മാറിയിരിക്കുന്നു.
രക്തസമ്മർദ്ദം ഒരു വ്യക്തിയെ കൂടുതൽ ആരോഗ്യപ്രശ്നങ്ങളിലേക്ക് നയിക്കുന്നു. രക്തസമ്മർദ്ദത്തിന്റെ നില 120/80 റീഡിംഗ് സാധാരണമായി കണക്കാക്കുന്നു, അതേസമയം 140/90 റീഡിംഗ് പ്രീ-ഹൈപ്പർടെൻസിവ് ആയി കണക്കാക്കപ്പെടുന്നു, കൂടാതെ 140/90 ന് മുകളിലുള്ളത് ഹൈപ്പർ ടെൻ‌സീവ് ആയി കണക്കാക്കുന്നു. പല ഭക്ഷണങ്ങളും ഭക്ഷണ ഘടകങ്ങളും രക്തസമ്മർദ്ദത്തെ സ്വാധീനിക്കുന്നുണ്ട്.
ഉയർന്ന അളവിൽ സോഡിയം അടങ്ങിയ ഭക്ഷണം കഴിക്കുന്ന ഒരാൾക്ക് ഉയർന്ന രക്തസമ്മർദ്ദം ഉണ്ടാകാനുള്ള സാധ്യതയുണ്ടെന്ന് ഗവേഷണങ്ങൾ വ്യക്തമാക്കുന്നു. അമിതവണ്ണമുള്ളവരിലും പ്രമേഹരോഗികളിലും രക്തസമ്മർദ്ദം വർധിക്കുന്നതിനുള്ള സാധ്യത കൂടുതലാണ്. അമിതമായി പുകവലിക്കുകയും മദ്യപിക്കുകയും ചെയ്യുന്ന വ്യക്തികൾക്കും ഉയർന്ന രക്തസമ്മർദ്ദം ഉണ്ടാകാറുണ്ട്.
രക്തസമ്മർദ്ദം കുറയ്ക്കുന്നതിനുള്ള മാർഗങ്ങൾ
വീറ്റ് ഗ്രാസ് ജ്യൂസ്: മഗ്നീഷ്യം, പൊട്ടാസ്യം എന്നിവയുടെ സമൃദ്ധമായ ഉറവിടമാണ് വീറ്റ് ഗ്രാസ്. ഈ ധാതുക്കൾ രക്തസമ്മർദ്ദം കുറയ്ക്കുന്നതിന് സഹായിക്കുന്നു. കൂടാതെ, വീറ്റ് ഗ്രാസ് ജ്യൂസ് നിങ്ങളുടെ ശരീരത്തെ ശുദ്ധീകരിക്കുകയും പോഷിപ്പിക്കുകയും നിങ്ങളുടെ രോഗപ്രതിരോധ സംവിധാനത്തെ മികച്ചതാക്കുകയും ചെയ്യും.
നിങ്ങളുടെ ഭക്ഷണത്തിൽ പൊട്ടാസ്യം വർധിപ്പിക്കുക: നമ്മുടെ ശരീരത്തിലെ എല്ലാ കോശങ്ങളുടെയും ശരിയായ പ്രവർത്തനത്തിന് പൊട്ടാസ്യം വളരെ പ്രധാനമാണ്. സോഡിയം കൂടുതലായി കഴിക്കുന്നത് ശരീരത്തിൽ വെള്ളം നിലനിർത്തുന്നതിന് കാരണമാകുന്നു. കുറഞ്ഞ പൊട്ടാസ്യം കഴിക്കുന്നതും ഉയർന്ന സോഡിയം കഴിക്കുന്നതും ഉയർന്ന രക്തസമ്മർദ്ദത്തിന് കാരണമാകുന്നു.
കൊഴുപ്പ് നീക്കിയ പാൽ: ഇത് കാൽസ്യത്തിന്റെയും വിറ്റാമിൻ ഡിയുടെയും നല്ല ഉറവിടമാണ്. കാത്സ്യവും വിറ്റാമിൻ ഡിയും രക്തസമ്മർദ്ദം കുറയ്ക്കാൻ സഹായിക്കുന്നു. പൊട്ടാസ്യത്തിന്റെയും മികച്ച ഉറവിടമായതിനാൽ ഇത് രക്തസമ്മർദ്ദം കുറയ്ക്കാൻ മികച്ചതാണ്.
പച്ചക്കറികൾ: ഹൈപ്പർടെൻഷനുള്ള ഏറ്റവും നല്ല ഭക്ഷണം പച്ചക്കറികൾ കൂടുതൽ അടങ്ങിയ ഭക്ഷണക്രമം പാലിക്കുക എന്നതാണ്. സെലറി, തക്കാളി, ക്രൂസിഫറസ് പച്ചക്കറികൾ, ഇലക്കറികൾ തുടങ്ങിയവ രക്തസമ്മർദ്ദം നിയന്ത്രിക്കുന്നതിനുള്ള ഡയറ്റിൽ ചേർക്കേണ്ട ചില പച്ചക്കറികളാണ്.
തേങ്ങാവെള്ളം: പൊട്ടാസ്യം ഉൾപ്പെടെയുള്ള ഇലക്‌ട്രോലൈറ്റുകളാൽ സമ്പുഷ്ടമാണ് തേങ്ങാവെള്ളം. തേങ്ങാവെള്ളം കുടിക്കുന്നത് രക്തസമ്മർദ്ദം കുറയ്ക്കാൻ സഹായിക്കും.
വെളുത്തുള്ളി: ഇത് ഒരു വാസോഡിലേറ്ററായി പ്രവർത്തിക്കുന്നു. ഇത് രക്തക്കുഴലുകളെ വികസിപ്പിക്കുകയും രക്തസമ്മർദ്ദം കുറയ്ക്കുകയും ചെയ്യുന്നു. രണ്ട് അല്ലി അരിഞ്ഞ വെളുത്തുള്ളി വെറും വയറ്റിൽ കഴിക്കുന്നത് രക്താതിമർദ്ദത്തിന് ഗുണം ചെയ്യുമെന്ന് കരുതപ്പെടുന്നു.
തൈര്: പ്രതിദിനം ഒരു കപ്പ് തൈര് കഴിക്കുന്നത് ഉയർന്ന രക്തസമ്മർദ്ദം ഉണ്ടാകാനുള്ള സാധ്യത കുറയ്ക്കും. തൈരിൽ കാത്സ്യം, മഗ്നീഷ്യം, പൊട്ടാസ്യം തുടങ്ങിയ ധാതുക്കൾ അടങ്ങിയിട്ടുണ്ട്.
രക്തസമ്മർദ്ദം കുറയ്ക്കുന്നതിന് കൃത്യമായ ഭക്ഷണക്രമം പിന്തുടരുന്നതിനൊപ്പം ചിട്ടയായ വ്യായാമവും ശീലമാക്കണം. ഉദാസീനമായ ജീവിതശൈലി രക്തസമ്മർദ്ദം വർധിപ്പിക്കുമെന്ന് പഠനങ്ങൾ വ്യക്തമാക്കുന്നു. ഉപ്പ് കഴിക്കുന്നത് കുറയ്ക്കുന്നത് രക്തസമ്മർദ്ദം കുറയ്ക്കാൻ നല്ല ആശയമാണെങ്കിലും, കാത്സ്യം, പൊട്ടാസ്യം, മഗ്നീഷ്യം എന്നിവയുടെ അളവ് വർധിപ്പിക്കുകയും ശരീരഭാരം കുറയ്ക്കുകയും ചെയ്യുന്നത് ഉയർന്ന രക്തസമ്മർദ്ദത്തിന് പരിഹാരമാകും.
കുറിപ്പ്: ലേഖനം പൊതുവായ വിവരങ്ങളെ അടിസ്ഥാനമാക്കിയുള്ളതാണ്. ഒരു മെഡിക്കൽ വിദഗ്ധന്റെ ഉപദേശത്തിന് പകരമല്ല. നിങ്ങളുടെ ഭക്ഷണക്രമത്തിൽ എന്തെങ്കിലും തരത്തിലുള്ള മാറ്റങ്ങൾ വരുത്തുന്നതിന് മുൻപ് നിങ്ങളുടെ ഡോക്ടറുമായി കൂടിയാലോചിക്കേണ്ടത് പ്രധാനമാണ്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...