Mumps outbreak: കേരളത്തിൽ മുണ്ടിനീര് വ്യാപിക്കുന്നുവെന്ന് റിപ്പോർട്ട്; ലക്ഷണങ്ങൾ, ചികിത്സ, പ്രതിരോധം... അറിഞ്ഞിരിക്കേണ്ടതെല്ലാം

കേരളത്തിൽ മുണ്ടിനീര് കേസുകൾ വർധിക്കുന്നു. പാരാമിക്സോവൈറസ് മൂലമാണ് മുണ്ടിനീര് ഉണ്ടാകുന്നത്. പൊതുവേ ഇത് വലിയ ആരോ​ഗ്യ സങ്കീർണതകളിലേക്ക് നയിക്കില്ലെങ്കിലും ചില കേസുകളിൽ ​ഗുരുതരമായേക്കാം. കേരളത്തിൽ ഈ മാസം മാത്രം 2,205 കേസുകൾ റിപ്പോർട്ട് ചെയ്യപ്പെട്ടതോടെ മുണ്ടിനീര് അതിവേ​ഗം വ്യാപിക്കുന്നതായാണ് വ്യക്തമാകുന്നത്. 

മാർച്ച് പത്തിന് 190 കേസുകൾ റിപ്പോർട്ട് ചെയ്തു. മുണ്ടിനീര് ചില കേസുകളിൽ മസ്തിഷ്ക വീക്കത്തിനോ കേൾവിക്കുറവിനോ കാരണമാകും. മുണ്ടിനീര് ഏത് പ്രായക്കാരെയും ബാധിക്കാവുന്ന രോ​ഗമാണ്. എന്നാൽ, അഞ്ച് മുതൽ ഒമ്പത് വയസുവരെയുള്ള കുട്ടികളിലാണ് ഇത് കൂടുതലായി കണ്ടുവരുന്നത്. ഏകദേശം രണ്ട് മുതൽ നാല് ആഴ്ചവരെയാണ് ഈ വൈറസിന്റെ ഇൻകുബേഷൻ കാലയളവ്. ഇതിന് ശേഷം ലക്ഷണങ്ങൾ പ്രകടമാകും.

തലവേദന, പനി തുടങ്ങിയ ലക്ഷണങ്ങളോടെയാണ് മുണ്ടിനീര് ആരംഭിക്കുന്നത്. ദിവസങ്ങൾ കഴിയുംതോറും ഉമിനീർ ​ഗ്രന്ഥികൾ വീർക്കും. മോണോവാലന്റ് വാക്സിൻ, ബൈവാലന്റ് മീസിൽസ്-മംപ്സ് വാക്സിൻ, ട്രിവാലന്റ് മീസിൽസ്-മംപ്സ്-റൂബെല്ല വാക്സിൻ എന്നിവയാണ് ഈ രോ​ഗത്തെ പ്രതിരോധിക്കുന്നതിനുള്ള വാക്സിനുകളെന്ന് ലോകാരോ​ഗ്യ സംഘടന വ്യക്തമാക്കുന്നു.

രോ​ഗിയുമായി നേരിട്ടുള്ള സമ്പർക്കത്തിലൂടെയോ രോ​ഗബാധിതരായ വ്യക്തികളുടെ ശ്വാസത്തിലൂടെ പുറത്ത് വരുന്ന ഉമിനീരിലൂടെയോ ആണ് മുണ്ടിനീര് പകരുന്നത്. ഉമിനീർ ​ഗ്രന്ഥികൾ വീർത്തുവരിക, തൊണ്ടവേദന, പനി, തലവേദന, ക്ഷീണം, വിശപ്പില്ലായ്മ എന്നിവയാണ് ഇതിന്റെ ലക്ഷണങ്ങൾ. വൈറസ് ബാധിച്ച എല്ലാ വ്യക്തികളിലും രോ​ഗലക്ഷണങ്ങൾ ഉണ്ടാകണമെന്നില്ല. രോ​ഗം സുഖപ്പെടുന്നതിന് രണ്ടാഴ്ചയോളം സമയമെടുക്കും.

മുണ്ടിനീരിന്റെ ലക്ഷണങ്ങൾ

പനി
തലവേദന
പേശി വേദന
ക്ഷീണം
വിശപ്പില്ലായ്മ
ഭക്ഷണം ചവയ്ക്കുമ്പോഴോ വിഴുങ്ങുമ്പോഴോ വേദന

മുണ്ടിനീര് ഉണ്ടാകുന്നതിന് പിന്നിലെ കാരണങ്ങൾ

വാക്സിനേഷൻ്റെ അഭാവം മുതൽ പ്രതിരോധശേഷി കുറയുന്നത് വരെ, മുണ്ടിനീര് ഉണ്ടാകാൻ നിരവധി കാരണങ്ങളുണ്ട്.

വാക്സിനേഷൻ: വാക്സിനേഷൻ നിരക്ക് കുറവുള്ളതോ അല്ലെങ്കിൽ വാക്സിനേഷൻ എടുക്കാത്ത വ്യക്തികൾ കൂടുതലുള്ളതോ ആയ പ്രദേശങ്ങളിലാണ് മുണ്ടിനീര് കൂടുതലായി വ്യാപിക്കുന്നത്. എംഎംആർ (മീസിൽസ്, മുണ്ടിനീര്, റൂബെല്ല) വാക്സിൻ മുണ്ടിനീര് തടയുന്നതിന് ഫലപ്രദമാണ്. എന്നാൽ, വാക്സിനേഷൻ നിരക്ക് കുറയുന്നത് രോ​ഗവ്യാപനത്തിന് കാരണമാകാം.

രോ​ഗിയുമായുള്ള അടുത്ത സമ്പർക്കം: രോ​ഗിയുമായുള്ള അടുത്ത സമ്പർക്കത്തിലൂടെ മുണ്ടിനീര് പകരാം. ചുമ, തുമ്മൽ, സംസാരം എന്നിവയിലൂടെ പുറത്തെത്തുന്ന ഉമിനീരിലൂടെ മുണ്ടിനീര് പകരാൻ സാധ്യതയുണ്ട്. രോ​ഗബാധിതനായ വ്യക്തിയിൽ നിന്ന് ഉമിനീർ, മ്യൂക്കസ് എന്നിവ നേരിട്ട് മറ്റുള്ളവരിൽ എത്തുന്നതും രോ​ഗം പരത്തുന്നു. ഹോസ്റ്റലുകൾ, ഡോർമിറ്റിറികൾ എന്നിവിടങ്ങളിൽ വ്യാപന സാധ്യത കൂടുതലാണ്.

ദുർബലമായ പ്രതിരോധശേഷി: എച്ച്ഐവി/ എയ്ഡ്സ് തുടങ്ങിയ രോ​ഗാവസ്ഥകൾ ഉള്ളവർ, കീമോതെറാപ്പിക്ക് വിധേയരായവർ തുടങ്ങി രോ​ഗ പ്രതിരോധശേഷി കുറഞ്ഞ ആളുകൾക്ക് മുണ്ടിനീർ ഉണ്ടാകാനും ലക്ഷണങ്ങൾ ​ഗുരുതരമാകാനും സാധ്യതയുണ്ട്.

ചികിത്സ

മുണ്ടിനീരിന് പ്രത്യേക ചികിത്സയില്ല. അതിനാൽ, രോ​ഗലക്ഷണങ്ങൾ ലഘൂകരിക്കുന്നതിന് ശരീരത്തിന് വിശ്രമം, ജലാംശം എന്നിവ ലഭ്യമാക്കുക. പനി, തലവേദന എന്നീ ലക്ഷണങ്ങൾ കുറയ്ക്കുന്നതിന് വേദനസംഹാരികൾ ഉപയോ​ഗിക്കാം. വൈറസ് വ്യാപനം തടയുന്നതിന് രോ​ഗബാധിതരായ വ്യക്തികളിൽ നിന്ന് അകലം പാലിക്കുക. മുണ്ടിനീര് തടയാൻ ഫലപ്രദമായ മാർ​ഗം വാക്സിനേഷനാണ്. രണ്ട് ഡോസുകളിലായാണ് വാക്സിനേഷൻ നൽകുന്നത്. ആദ്യ ഡോസ് 12-15 മാസം പ്രായമുള്ളപ്പോഴും രണ്ടാമത്തെ ഡോസ് 4-6 വയസിലുമാണ്. ഈ പ്രായത്തിൽ വാക്സിനെടുത്തോ എന്ന് ഉറപ്പില്ലാത്തവർ മുതിർന്ന ശേഷമോ വാക്സിൻ സ്വീകരിക്കണം.