Viral fever: വൈറൽ പനി പെട്ടെന്ന് കുറയാൻ എന്ത് ചെയ്യണം? ഈ നുറുങ്ങുകൾ പരിക്ഷിക്കൂ..!

മഴക്കാലത്തും മഞ്ഞുകാലത്തുമെല്ലാം പലരെയും ജലദോഷവും വൈറൽ പനിയുമെല്ലാം പിടികൂടാറുണ്ട്. ഡെങ്കിപ്പനിയും മലേറിയയുമെല്ലാം ഇക്കാലയളവിൽ കണ്ടുവരാറുണ്ട്. ഇത്തരം പനി ബാധിച്ചവർക്ക് ശരീരത്തിന് വലിയ രീതിയിൽ തളർച്ച അനുഭവപ്പെടും. വൈറൽ പനി ബാധിച്ചാൽ നിങ്ങൾ ഏഴ് മുതൽ എട്ട് ദിവസം വരെ വിശ്രമിക്കണം. അല്ലെങ്കിൽ, പനി കൂടുതൽ വഷളാകാൻ സാധ്യതയുണ്ട്. കൂടാതെ, ആരോ​ഗ്യവിദ​ഗ്ധർ നിർദ്ദേശിക്കുന്ന മരുന്നുകൾ കഴിക്കണം. പനി പെട്ടെന്ന് കുറയ്ക്കാൻ പലതരം ടിപ്പുകൾ ഉണ്ട്. അത് എന്തൊക്കെയാണെന്ന് നോക്കാം. 

വൈറൽ പനിയുള്ളവർ നിർബന്ധമായും ചൂടുവെള്ളത്തിൽ കുളിക്കണം. ചൂടുവെള്ളത്തിൽ കുളിക്കുന്നത് മൂലം ശരീരോഷ്മാവ് അൽപ്പം കൂടിയാലും ക്രമേണ കുറയാൻ സാധ്യതയുണ്ടെന്ന് ആരോഗ്യവിദഗ്ധർ പറയുന്നു. കൂടാതെ, സോക്‌സ് വെള്ളത്തിൽ മുക്കി കാലിൽ ധരിച്ചാൽ കാലിലെ ചൂട് കുറയാനും സാധ്യതയുണ്ട്. കൂടാതെ ഈ സമയത്ത് ബെഡ് റെസ്റ്റ് എടുക്കണം. ഇങ്ങനെ വിശ്രമിക്കുന്നതിലൂടെ പനി എളുപ്പത്തിൽ കുറയും. പ്രത്യേകിച്ച് ചെറിയ കുട്ടികളിൽ പനി വന്നാൽ ഈ ടിപ്പുകൾ പാലിച്ചാൽ അത് എളുപ്പം കുറയ്ക്കാൻ സാധിക്കും. പ്രതിരോധശേഷിയും വർദ്ധിക്കും. 

പനിയുടെ തീവ്രത കൂടുതലാണെങ്കിൽ ചെറിയ തൂവാലകൾ എടുത്ത് തണുത്ത വെള്ളത്തിൽ മുക്കി നെറ്റിയിൽ വെയ്ക്കുക. മാത്രമല്ല, ഈ തൂവാലകൾ കഴുത്തിലും കാലിലും വെച്ചാൽ പനി എളുപ്പത്തിൽ കുറയും. ഇടയ്ക്കിടെ പനി വരുന്നുണ്ടെങ്കിൽ അധികം ഭക്ഷണം കഴിക്കാതിരിക്കുന്നതാണ് നല്ലതെന്ന് വിദഗ്ധർ പറയുന്നു. വൈറൽ പനി ബാധിച്ചവർ ആരോഗ്യകരമായ ഭക്ഷണങ്ങൾ മാത്രം കഴിക്കണമെന്നാണ് വിദഗ്ധർ നിർദേശിക്കുന്നത്. 

കടുത്ത പനിയുള്ളവർ ചോറ് കഴിക്കാതിരിക്കുന്നത് വളരെ നല്ലതാണ്. പകരം വിറ്റാമിൻ സി കൂടുതലുള്ള പഴങ്ങൾ കഴിക്കുന്നത് വളരെയധികം ​ഗുണം ചെയ്യും. പനിയുള്ളവർ ദിവസവും ഓറഞ്ച്, മുന്തിരി, കിവി തുടങ്ങിയ പഴങ്ങൾ കഴിക്കുന്നത് ശരീരത്തിന്റെ പ്രതിരോധശേഷി എളുപ്പത്തിൽ വർധിപ്പിക്കും. പനി കുറഞ്ഞതിന് ശേഷം വെജിറ്റബിൾ, ചിക്കൻ സൂപ്പ് കുടിക്കുന്നത് നല്ലതാണ്. ഇത് കുടിച്ചാൽ പനി വീണ്ടും കുറയുകയും അണുബാധയിൽ നിന്ന് രക്ഷനേടാനും സാധിക്കും.