Monkey Attack: കുരങ്ങിന്‍റെ ആക്രമണത്തില്‍ 10 വയസുകാരന്‍ കൊല്ലപ്പെട്ടു

Gandhinagar, Gujarat: കുരങ്ങിന്‍റെ ആക്രമണത്തില്‍ 10 വയസുകാരന്‍ കൊല്ലപ്പെട്ടു. ഗുജറാത്തിലെ ഗാന്ധിനഗറിലാണ് സംഭവം. 

ഗുജറാത്തിലെ ഗാന്ധിനഗറിലെ സാൽകി ഗ്രാമത്തിൽ ചൊവ്വാഴ്ചയാണ് ദാരുണമായ സംഭവം നടന്നതെന്ന് പോലീസ് പറഞ്ഞു. ദെഹ്ഗാം താലൂക്കിലെ ഒരു ക്ഷേത്രത്തിന് സമീപമാണ് ബാലന്‍റെ നേര്‍ക്ക് കുരങ്ങിന്‍റെ ആക്രമണം ഉണ്ടായത് എന്ന് വനംവകുപ്പ് ഉദ്യോഗസ്ഥർ പറഞ്ഞു. ദീപക് താക്കൂർ എന്ന 10 വയസുകാരനാണ് കൊല്ലപ്പെട്ടത്. 

ഗ്രാമത്തിൽ സുഹൃത്തുക്കളോടൊപ്പം കളിക്കുകയായിരുന്ന ദീപകിനെ കുരങ്ങുകള്‍ ആക്രമിക്കുകയായിരുന്നു.  ആക്രമണം ഉണ്ടായ ഉടന്‍ തന്നെ കുട്ടിയെ പ്രാദേശിക ആശുപത്രിയിൽ എത്തിച്ചെങ്കിലും വഴി മധ്യ മരണം സംഭവിക്കുകയായിരുന്നു. കുട്ടിയുടെ മേല്‍ ചാടിവീണ കുരങ്ങുകളുടെ നഖം ശരീരത്തില്‍ ആഴത്തില്‍ തുളഞ്ഞു കയറി.  കുരങ്ങുകളുടെ ആക്രമണത്തില്‍ ബാലന്‍റെ കുടൽ മുറിഞ്ഞുപോയതായും ഡോക്ടര്‍മാര്‍ പറയുന്നു. 

കഴിഞ്ഞ ഒരാഴ്ചയ്ക്കിടെ ഗ്രാമത്തിൽ കുരങ്ങുകൾ നടത്തുന്ന മൂന്നാമത്തെ ആക്രമണമാണിത്. ഗ്രാമത്തിലെ കുരങ്ങുകളെ പിടികൂടാനുള്ള ശ്രമത്തിലാണ് വാനംവകുപ്പ് ഉദ്യോഗസ്ഥര്‍ എന്നാണ് റിപ്പോര്‍ട്ട്. ഹനുമാന്‍ കുരങ്ങ് ഇനത്തില്‍പ്പെട്ട കുരങ്ങുകളാണ് ആക്രമണം നടത്തുന്നത് എന്ന് വന്‍ വകുപ്പ് ഉദ്യോഗസ്ഥര്‍ പറയുന്നു. ഇവയെ പിടികൂടാനുള്ള നടപടി ആരംഭിച്ചുകഴിഞ്ഞു. കഴിഞ്ഞ ഒരാഴ്ചയ്ക്കിടെ രണ്ട് ഹനുമാന്‍ കുരങ്ങുകളെ പിടികൂടി. ശേഷിച്ചവയെ പിടികൂടാന്‍ കൂടുകൾ സ്ഥാപിച്ചു കഴിഞ്ഞതായി അധികൃതര്‍ വ്യക്തമാക്കി. 

വലിയ ഒരു സംഘം ഹനുമാന്‍ കുരങ്ങുകളാണ് ഗ്രാമത്തില്‍ ഉള്ളത്. ഇവയില്‍ മുതിര്‍ന്നവയാണ് ആളുകളെ ആക്രമിക്കുന്നത്.