Sukhbir Singh Badal: അകാലിദള്‍ നേതാവ് സുഖ്ബീര്‍ ബാദലിന് നേരെ വെടിവയ്പ്: അക്രമി കസ്റ്റഡിയിൽ

ന്യൂഡൽഹി: അകാലിദള്‍ നേതാവും പഞ്ചാബ് മുൻ ഉപമുഖ്യമന്ത്രിയുമായ സുഖ്ബീര്‍ സിങ് ബാദലിന് നേരെ വെടിവയ്പ്. അതീവ സുരക്ഷാ മേഖലയായ അമൃത്‍സറിലെ സുവര്‍ണ ക്ഷേത്രത്തിനുള്ളിൽ വെച്ചാണ് സുഖ്ബീര്‍ സിങ് ബാദലിന് നേരെ വെടിവെയ്പ്പുണ്ടായത്. രണ്ടു തവണ ഇദ്ദേഹത്തിന് നേരെ അക്രമി വെടിയുതിര്‍ത്തു. 

സംഭവത്തിന്‍റെ ദൃശ്യങ്ങൾ പുറത്തുവന്നു. ക്ഷേത്രത്തിൽ മതപരമായ ചടങ്ങുകള്‍ നടക്കുന്നതിനിടെയാണ് അക്രമം. സുവര്‍ണ ക്ഷേത്രത്തിന്‍റെ പ്രവേശന കവാടത്തിനരികിൽ വീൽ ചെയറിലിരിക്കുകയായിരുന്ന സുഖ്ബീര്‍ സിങിനുനേരെ പെട്ടെന്ന് വെടിയുതിര്‍ക്കുകയായിരുന്നു. അക്രമിയെ ഉടൻ തന്നെ സുഖ്ബീര്‍ സിങിന്‍റെ ഒപ്പമുണ്ടായിരുന്നവര്‍ പിടികൂടി. 

പ്രവേശന കവാടത്തിന്‍റെ ചുവരിലാണ് വെടിയുണ്ടകള്‍ പതിച്ചത്. ആക്രമണത്തിൽ ആര്‍ക്കും അപകടമുണ്ടായിട്ടില്ലെന്നും പൊലീസ് പറഞ്ഞു. സുഖ്ബീര്‍ സിങ് സുരക്ഷിതനാണെന്ന് പൊലീസ് അറിയിച്ചു. നാരണയണ്‍ സിങ് എന്നായാളാണ് സുഖ്ബീര്‍ സിങിനുനേരെ വെടിയുതിര്‍ത്തത്. ഇയാളെ പൊലീസ് കസ്റ്റഡിയിലെടുത്ത് ചോദ്യം ചെയ്തുവരുകയാണ്. ഇയാൾക്ക് ഖാലിസ്ഥാൻ ബന്ധമുണ്ടെന്നാണ് പൊലീസ് നൽകുന്ന സൂചന. ബബർ ഖൽസ എന്ന സംഘടനയുടെ അംഗമാണ് അക്രമിയെന്നും പൊലീസ് വൃത്തങ്ങൾ അറിയിച്ചു.