Nitish Kumar: നിതീഷ് കുമാർ രാജി വെച്ചു; ബീഹാറിൽ ഓപ്പറേഷന‍്‍ താമര ഫലം കണ്ടു

പാറ്റ്ന: ബീഹാർ മുഖ്യമന്ത്രി നിതീഷ് കുമാർ മുഖ്യമന്ത്രി സ്ഥാനം രാജി വെച്ചു. ഇന്ത്യ സഖ്യത്തിന് ഏറ്റ കനത്ത തിരിച്ചടിയാണ് നിതീഷ് കുമാറിന്റെ ഈ രാജി. ദിവസങ്ങൾക്ക് മുമ്പ് തന്നെ നിതീഷ് ബിജെപിയുമായ കൈകോർക്കുമെന്ന തരത്തിൽ അഭ്യൂഹങ്ങൾ ഉണ്ടായിരുന്നു. രാഹുൽ ​ഗാന്ധി നേതൃത്വം നൽകുന്ന ഭാരത് ജോ‍‍ഡോ ന്യയ് യാത്രയിൽ പങ്കെടുക്കില്ലെന്ന് അദ്ദേഹം നേരത്തെ തന്നെ വ്യക്തമാക്കിയിരുന്നു. 

ഞായറാഴ്ച്ച  രാവിലെ ചേർന്ന നിയമസഭാകക്ഷിയോ​ഗത്തിന് ശേഷമാണ് നിതീഷ് കുമാർ ​ഗവർണർക്ക് രാജി സമർപ്പിച്ചത്. ഇന്ന്(ഞായറാഴ്ച്ച) വൈകിട്ട് തന്നെ എൻഡിഎ മുഖ്യമന്ത്രിയായി സത്യപ്രതിജ്ഞ ചെയ്യുമെന്നും സൂചനയുണ്ട്. എന്നാൽ ഈ കാര്യത്തെ കുറിച്ച് നിതീഷ് കുമാർ ഇതുവരെ പ്രതികരിച്ചിട്ടില്ല. 

അതേസമയം ഇത്തവണ ബിജെപിക്ക് സ്വന്തം മുഖ്യമന്ത്രി വേണമെന്ന ആവശ്യം പാർട്ടിക്കുള്ളിൽ ശക്തമാകുന്നുണ്ട്. വലിയ രാഷ്ട്രീയ ചർച്ചകളാണ് കഴിഞ്ഞ ശനിയാഴ്ച്ച പാട്നയിൽ അരങ്ങേറിയത്‌. ആർജെ‍ഡി, ജെ‍‍‍ഡിയു നേതാക്കൾ പ്രത്യേക യോ​ഗം ചേർന്നു. കേന്ദ്ര നേതൃത്വവുമായി ബിജെപിയുടെ സംസ്ഥാന നേതാക്കൾ നിരന്തരം ചർച്ചകൾ നടത്തി.  നിതീഷിന്റെ രാജി ഇല്ലാതാക്കാൻ കോൺ​ഗ്രസ് വലിയ ശ്രമങ്ങൾ നടത്തിയെങ്കിലും ഫലം കണ്ടില്ല.