പെണ്‍കുട്ടിയെ പീഡിപ്പിച്ചു; ബിഹാര്‍ എംഎല്‍എയ്ക്ക് ജീവപര്യന്തം

പാട്‌ന: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച ബിഹാര്‍ എംഎല്‍എക്ക് ജീവപര്യന്തം ശിക്ഷ. നവാഡയിലെ രാഷ്ട്രീയ ജനതാ ദള്‍(ആര്‍ ജെ ഡി) എംഎല്‍എയായ രാജ് ബല്ലഭ് യാദവിനെയാണ് ജീവപര്യന്തം ശിക്ഷക്ക് വിധിച്ചത്. 50,000 രൂപ പിഴയും രാജ് ബല്ലഭിന് വിധിച്ചിട്ടുണ്ട്. 2016ലാണ് കേസിനാസ്പദമായ സംഭവം നടന്നത്.

ഡിസംബര്‍ 16ന് എംഎല്‍എ ഉള്‍പ്പെടെ അഞ്ച് പേര്‍ കുറ്റക്കാരാണെന്ന് കോടതി കണ്ടെത്തിയിരുന്നു. തുടര്‍ന്ന് ഡിസംബര്‍ 21ന് കേസില്‍ വാദം കേട്ട കോടതി പ്രതികള്‍ക്ക് ശിക്ഷ വിധിക്കുകയായിരുന്നു.

രാജ് ബല്ലഭിന് പുറമേ നാല് സ്ത്രീകള്‍ ഉള്‍പ്പെടെ അഞ്ച് പേര്‍ക്ക് കൂടി കോടതി തടവ് ശിക്ഷ വിധിച്ചിട്ടുണ്ട്. ഇതില്‍ പീഡനത്തില്‍ നേരിട്ട് ബന്ധമുള്ള രണ്ട് പേര്‍ക്ക് 20,000രൂപ പിഴയും ജിവപര്യന്തവും മറ്റുള്ളവര്‍ക്ക് 10,000 രൂപ പിഴയും തടവുമാണ് വിധിച്ചിട്ടുള്ളത്.

2016 ഫെബ്രുവരി ആറിന് കുട്ടിയുടെ പിറന്നാള്‍ ആഘോഷത്തില്‍ പങ്കെടുത്ത ബന്ധുകൂടിയായ സുലേഖ കള്ളം പറഞ്ഞ് എംഎല്‍എയുടെ വസതിയില്‍ കുട്ടിയെ എത്തിച്ചു. ഇവിടെ വെച്ച് കുട്ടിയെ രാജ് ബല്ലഭും മറ്റ് രണ്ട് പേരും ചേര്‍ന്ന് പീഡിപ്പിച്ചു. പീഡന വിവരം കുട്ടി മാതാപിതാക്കളെ അറിയിക്കുകയും ഇവര്‍ പൊലീസില്‍ പരാതി നല്‍കുകയും ചെയ്തു. 

പീഡന വിവരം പുറത്ത് പറയാതിരിക്കാന്‍ തങ്ങളെ ഭീഷണിപ്പെടുത്തിയിരുന്നതായി ഇവരുടെ പരാതിയില്‍ പറയുന്നു. 2016 ഫെബ്രുവരി 14ന് രാജ് ബല്ലഭിനെ പാര്‍ട്ടിയില്‍ നിന്ന് പുറത്താക്കുകയും നിയമസഭയിലെ അംഗത്വ സ്ഥാനം നഷ്ടപ്പെടുകയും ചെയ്തിരുന്നു.

ഇയാള്‍ 2016 നവംബര്‍ 24ന് നല്‍കിയ ജാമ്യാപേഷ സുപ്രീം കോടതി റദ്ദാക്കിയിരുന്നു. ഇതിന് പിന്നാലെ രാജ് ബല്ലഭ് കോടതിയില്‍ നേരിട്ട് ഹാജരാകുകയായിരുന്നു. രാജ് ബല്ലഭിനെതിരെ ഇന്ത്യന്‍ ശിക്ഷ നിയമം 376 പോസ്‌കോ എന്നിവയാണ് ചുമത്തിരിക്കുന്നത്. സുലേഖക്ക് ജീവപര്യന്തവും 10,000 രൂപ പിഴയും കോടതി വിധിച്ചിട്ടുണ്ട്.