RTE Amendments 2024: ഇനി `ഓൾ പാസ്` വേണ്ട, പരാജയപ്പെട്ടാൽ അതേ ക്ലാസിൽ തുടരണം; ആർടിഇ നിയമത്തിൽ ഭേദ​ഗതിയുമായി കേന്ദ്രം

ന്യൂഡൽഹി: രാജ്യത്തെ എല്ലാ കുട്ടികൾക്കും നിർബന്ധിതവും സൗജന്യവുമായ ഔപചാരിക വിദ്യാഭ്യാസം നൽകുന്നത് സംബന്ധിച്ച 2010ലെ നിയമത്തിൽ കേന്ദ്ര സർക്കാർ ഭേദ​ഗതി വരുത്തി. പുതിയ ഭേദ​ഗതി പ്രകാരം 5, 8 ക്ലാസുകളിലെ വിദ്യാർത്ഥികൾക്ക് പതിവായി പരീക്ഷകൾ നടത്താനുള്ള അധികാരം സംസ്ഥാന സർക്കാരുകൾക്ക്ലഭിക്കും. ഈ പരീക്ഷകളിൽ വിദ്യാർത്ഥികൾ പരാജയപ്പെട്ടാൽ രണ്ട് മാസത്തിന് ശേഷം ഒരു അവസരം കൂടി ലഭിക്കും. എന്നാൽ രണ്ടാമത്തെ അവസരത്തിലും  പരാജയപ്പെട്ടാൽ വിദ്യാർത്ഥിയ്ക്ക് അതേ ക്ലാസിൽ തന്നെ തുടരേണ്ടി വരും. 

നിലവിലുള്ള നോ-ഡിറ്റൻഷൻ നയം അനുസരിച്ച് 1 മുതൽ 8 വരെയുള്ള ക്ലാസുകളിലെ പ്രാഥമിക വിദ്യാഭ്യാസം പൂർത്തിയാകുന്നതുവരെ ഒരു വിദ്യാർത്ഥിയെയും പരാജയപ്പെടുത്തുകയോ സ്കൂളിൽ നിന്ന് പുറത്താക്കുകയോ ചെയ്യാൻ പാടില്ല. 8-ാം ക്ലാസ് വരെയുള്ള എല്ലാ വിദ്യാർത്ഥികളെയും അടുത്ത ക്ലാസിലേക്ക് ജയിപ്പിച്ച് വിടണം എന്നതായിരുന്നു നിയമം. ഈ നിയമത്തിലാണ് ഇപ്പോൾ കേന്ദ്ര സർക്കാർ ഭേദ​ഗതി വരുത്തിയിരിക്കുന്നത്. 

അതേസമയം ഈ നിയമഭേ​ദ​ഗതി സംബന്ധിച്ച് സമ്മിശ്ര പ്രതികരണങ്ങളാണ് രാജ്യത്തുടനീളം ഉണ്ടായിരിക്കുന്നത്. ഗുജറാത്ത്, ഒഡീഷ, മധ്യപ്രദേശ്, ജാർഖണ്ഡ്, കർണാടക, ഡൽഹി എന്നിവയുൾപ്പെടെ ചില സംസ്ഥാനങ്ങൾ പുതിയ ഭേദ​ഗതി നടപ്പിലാക്കാൻ തീരുമാനിച്ചിട്ടുണ്ട്. എന്നാൽ കേന്ദ്രത്തിന്റെ തീരുമാനത്തിൽ കേരളം നേരത്തെ തന്നെ എതിർപ്പ് പ്രകടിപ്പിച്ചിരുന്നു. തീരുമാനം വിദ്യാർത്ഥികളുടെ സമ്മർദ്ദം വർദ്ധിപ്പിക്കുമെന്നും നിരന്തര മൂല്യനിർണയം മെച്ചപ്പെടുത്തുകയാണ് വിദ്യാർത്ഥികളുടെ അറിവ് മെച്ചപ്പെടുത്താൻ വേണ്ടതെന്നുമാണ് കേരളത്തിന്റെ നിലപാട്.