Sitaram Yechury: വിട, ഡിയർ കൊമ്രേഡ്; സീതാറാം യെച്ചൂരി അന്തരിച്ചു

ന്യൂഡൽഹി: സിപിഎം ജനറൽ സെക്രട്ടറി സീതാറാം യെച്ചൂരി അന്തരിച്ചു. 72 വയസായിരുന്നു. ന്യുമോണിയ ബാധിച്ച് ചികിത്സയിലായിരുന്നു. ഡൽഹി എയിംസിൽ ചികിത്സയിലിരിക്കേയായിരുന്നു അന്ത്യം. മൃതദേഹം എയിംസിൽ പഠനത്തിന് വിട്ടുനൽകും. ശനിയാഴ്ച എകെജി സെൻററിൽ പൊതുദർശനം. സിപിഎമ്മിൻറെ തകർച്ചയുടെ കാലത്തുനിന്ന് പാർട്ടിയെ നയിച്ച നേതാവ്. വിദ്യാർഥി രാഷ്ട്രീയത്തിലൂടെ 1974ൽ എസ്എഫ്ഐയിലൂടെയായിരുന്നു രാഷ്ട്രീയ പ്രവേശനം.

ജെഎൻയുവിലെ പഠനകാലത്ത് പ്രാസംഗികനായും വിപ്ലവകാരിയായും ജ്വലിച്ച നേതാവ്. 2005 മുതൽ 2017 വരെ രാജ്യസഭാംഗമായിരുന്നു. പശ്ചിമബംഗാളിൽ നിന്നാണ് അദ്ദേഹം രാജ്യസഭയിലെത്തിയത്. 1992 മുതൽ അദ്ദേഹം പൊളിറ്റ്ബ്യൂറോ അംഗമാണ്. 2015ൽ ആണ് യെച്ചൂരി സിപിഎം ജനറൽ സെക്രട്ടറിയായത്. 2022ൽ ഏപ്രിലിൽ കണ്ണൂരിൽ നടന്ന ഇരുപത്തിമൂന്നാം പാർട്ടി കോൺഗ്രസിൽ അദ്ദേഹത്തെ മൂന്നാം തവണയും ജനറൽ സെക്രട്ടറിയായി പാർട്ടി തെരഞ്ഞെടുത്തിരുന്നു.

സീതാറാം യെച്ചൂരിയുടെ നിര്യാണത്തിൽ മുഖ്യമന്ത്രി പിണറായി വിജയൻ്റെ  അനുശോചനം

കമ്മ്യൂണിസ്റ്റ് പ്രസ്ഥാനത്തിന്റെ സമാനതകളില്ലാത്ത ധീരനേതാവായിരുന്നു സീതാറാം യെച്ചൂരിയെന്ന് മുഖ്യമന്ത്രി പിണറായി വിജയൻ അനുശോചിച്ചു. അതീവദുഃഖത്തോടെയും ഹൃദയവേദനയോടെയുമാണ് സീതാറാമിന്റെ നിര്യാണ വാർത്ത കേൾക്കുന്നത്. വിദ്യാർത്ഥി പ്രസ്ഥാനത്തിൽ നിന്ന് ഉയർന്നു വന്ന അദ്ദേഹം ഒൻപത് വർഷക്കാലം സിപിഐഎമ്മിന്റെ ജനറൽ സെക്രട്ടറിയായി വൈഷമ്യമേറിയ രാഷ്ട്രീയ ഘട്ടങ്ങളിലൂടെ പാർട്ടിയെ നിയിച്ചുവെന്ന് പിണറായി അനുസ്മരിച്ചു.

പാർട്ടിയുടെ നേതൃപദവികളിലിരുന്ന് കൃത്യമായ നിലപാടുകൾ രൂപീകരിച്ചുകൊണ്ട് സിപിഐഎമ്മിനും ഇടതുപക്ഷത്തിനു പൊതുവിലും ഇന്ത്യൻ രാഷ്ട്രീയത്തിനാകെത്തന്നെയും മാർ​ഗനിർദ്ദേശകമാവിധം സീതാറാം പ്രവർത്തിച്ചു. രാജ്യവും ജനങ്ങളും ​ഗുരുതരമായ പ്രതിസന്ധികൾ നേരിടുന്ന ഘട്ടത്തിൽ സീതാറാമിന്റെ അഭാവം രാജ്യത്തിന് പൊതുവിൽ തന്നെ നികാത്താനാകാത്ത നഷ്ടമാണെന്ന് മുഖ്യമന്ത്രി പറഞ്ഞു.