Electoral Bond Data: ഇലക്ടറൽ ബോണ്ട് കേസ്; എസ്ബിഐ കൈമാറിയ പുതിയ വിവരങ്ങൾ തിരഞ്ഞെടുപ്പ് കമ്മിഷൻ പ്രസിദ്ധീകരിച്ചു- പട്ടിക

ന്യൂഡൽഹി: ഇലക്ടറൽ ബോണ്ട് കേസിൽ എസ്ബിഐ നൽകിയ പുതിയ വിവരങ്ങൾ പരസ്യപ്പെടുത്തി തിരഞ്ഞെടുപ്പ് കമ്മീഷൻ. തിരഞ്ഞെടുപ്പ് കമ്മീഷന്റെ ഔദ്യോ​ഗിക വെബ്സൈറ്റിലാണ് പരസ്യപ്പെടുത്തിയത്. സുപ്രീംകോടതിയുടെ നിർദേശപ്രകാരം വ്യാഴാഴ്ചയാണ് എസ്ബിഐ തിരഞ്ഞെടുപ്പ് കമ്മീഷന് വിവരങ്ങൾ കൈമാറിയത്.

ഇലക്ടറൽ ബോണ്ടുകളും സീരിയൽ നമ്പറുകളും ആൽഫ ന്യൂമെറിക് നമ്പറുകളും ഉൾപ്പെടെയുള്ള വിവരങ്ങളാണ് കൈമാറിയത്. അക്കൗണ്ട് നമ്പറും കെവൈസി ഡാറ്റയും ഒഴികെയുള്ള വിവരങ്ങളെല്ലാം കൈമാറിയെന്നാണ് എസ്ബിഐ സത്യവാങ്മൂലത്തിൽ അറിയിച്ചത്. എസ്ബിഐ നേരത്തെ നൽകിയ വിവരങ്ങൾ അപൂർണമാണെന്ന് ചൂണ്ടിക്കാട്ടി അതൃപ്തി അറിയിച്ച കോടതി എല്ലാ വിവരങ്ങളും വ്യാഴാഴ്ച അഞ്ച് മണിക്ക് മുൻപ് കൈമാറണമെന്ന് കർശന നിർദേശം നൽകിയിരുന്നു.

ഈ വിവരങ്ങൾ തിരഞ്ഞെടുപ്പ് കമ്മീഷന്റെ വെബ്സൈറ്റിൽ പ്രസിദ്ധീകരിക്കണമെന്നും ചീഫ് ജസ്റ്റിസ് അധ്യക്ഷനായ ബെഞ്ച് നിർദേശം നൽകിയിരുന്നു. ഇലക്ടറൽ ബോണ്ടുമായി ബന്ധപ്പെട്ട് കൈവശമുള്ള എല്ലാ വിവരങ്ങളും തിരഞ്ഞെടുപ്പ് കമ്മീഷന് കൈമാറാൻ സുപ്രീംകോടതി എസ്ബിഐക്ക് നിർദേശം നൽകിയിരുന്നു.