Mahua Moitra: എംപി സ്ഥാനം പോയിട്ടും ബംഗ്ലാവ് ഒഴിയാതെ മഹുവ, വീണ്ടും നോട്ടീസ് നല്‍കി കേന്ദ്ര സർക്കാർ

New Delhi: പാര്‍ലമെന്‍റില്‍നിന്നും അയോഗ്യയാക്കപ്പെട്ട തൃണമൂൽ കോൺഗ്രസ് എം.പി മഹുവ മൊയ്‌ത്രയ്‌ക്ക് ശക്തമായ മുന്നറിയിപ്പുമായി കേന്ദ്ര സർക്കാർ. എംപിയെന്ന നിലയിൽ അനുവദിച്ച സർക്കാർ ബംഗ്ലാവ് ഉടൻ ഒഴിഞ്ഞില്ലെങ്കിൽ ബലം പ്രയോഗിച്ച് പുറത്താക്കുമെന്നാണ് നോട്ടീസ്. സർക്കാർ സ്വത്തുക്കൾ കൈകാര്യം ചെയ്യുന്ന ഡയറക്ടറേറ്റ് ഓഫ് എസ്റ്റേറ്റ്സാണ് നോട്ടീസ് അയച്ചിരിക്കുന്നത്.

പാര്‍ലമെന്‍റില്‍നിന്നും അയോഗ്യയാക്കപ്പെട്ടതോടെ സര്‍ക്കാര്‍ ബംഗ്ലാവ് ഒഴിയാന്‍ നിര്‍ദ്ദേശിച്ചുകൊണ്ട് കഴിഞ്ഞ മാസം 12 ന് മഹുവയ്ക്ക് സര്‍ക്കാര്‍ നോട്ടീസ് നല്‍കിയിരുന്നു.  എന്നാല്‍, ബംഗ്ലാവ് ഒഴിയാന്‍ മഹുവ ഇതുവരെ തയ്യാറായിട്ടില്ല. ഇതോടെയാണ് ശക്തമായ ഭാഷയിൽ മുന്നറിയിപ്പുമായി കേന്ദ്രം പുതിയ നോട്ടീസ് അയച്ചിരിക്കുന്നത്. ബംഗ്ലാവ് ഒഴിഞ്ഞില്ലെങ്കിൽ, ബലമായി ഒഴിപ്പിക്കുമെന്നാണ് ഡയറക്ടറേറ്റ് ഓഫ് എസ്റ്റേറ്റ്‌സിന്‍റെ അറിയിപ്പ്.

കഴിഞ്ഞ 12 ന് നല്‍കിയ നോട്ടീസില്‍ 30 ദിവസത്തിനകം ബംഗ്ലാവ് കാലിയാക്കണം എന്നായിരുന്നു നിര്‍ദ്ദേശം. മതിയായ സമയം നൽകിയിട്ടും, അനധികൃത താമസക്കാരിയല്ലെന്ന് തെളിയിക്കുന്നതിൽ  മഹുവ പരാജയപ്പെട്ടുവെന്ന് നോട്ടീസിൽ പറയുന്നു. 

പുറത്താക്കപ്പെട്ട എംപിയോട് തൽക്കാലം ബംഗ്ലാവിൽ തുടരാൻ അനുവദിക്കണമെന്ന് ഡയറക്ടറേറ്റ് ഓഫ് എസ്റ്റേറ്റിനോട് അഭ്യർത്ഥിക്കാൻ ഈ മാസം ആദ്യം ഡൽഹി ഹൈക്കോടതി നിര്‍ദ്ദേശിച്ചിരുന്നു. അസാധാരണമായ സാഹചര്യങ്ങളിൽ ചാർജുകൾ അടച്ചാൽ ആറ് മാസം വരെ താമസിക്കാൻ നിയമങ്ങൾ അനുവദിച്ചിട്ടുണ്ടെന്നും കോടതി ചൂണ്ടിക്കാട്ടിയിരുന്നു. 

നരേന്ദ്ര മോദിയുടെ നേതൃത്വത്തിലുള്ള ബിജെപി സർക്കാരിനെ തകർക്കാൻ പാർലമെന്‍റിൽ ചോദ്യങ്ങൾ ചോദിക്കാൻ ഒരു വന്‍ വ്യവസായി, ദർശൻ ഹിരാനന്ദാനിയിൽ നിന്ന് സമ്മാനങ്ങളും പണവും സ്വീകരിച്ച കേസില്‍ തൃണമൂൽ കോൺഗ്രസ് നേതാവ് കുറ്റക്കാരിയാണ് എന്ന് കണ്ടെത്തിയതിനെത്തുടര്‍ന്നാണ് പാര്‍ലമെന്‍റ് എത്തിക്സ്  കമ്മിറ്റി അംഗത്വം റദ്ദാക്കല്‍ നടപടി സ്വീകരിച്ചത്. കൂടാതെ, പാർലമെന്‍റ്  ലോഗിൻ ക്രെഡൻഷ്യലുകൾ അയാളുമായി പങ്കുവച്ചുവെന്നും കണ്ടെത്തിയിരുന്നു. 

മഹുവ മൊയ്‌ത്ര അധാർമ്മികമായ പെരുമാറ്റം, പാർലമെന്‍റ് അംഗങ്ങൾക്ക് ലഭ്യമായ പദവികളുടെ ലംഘനം, സഭയെ അവഹേളിക്കൽ എന്നിവയിൽ കുറ്റക്കാരിയാണ് എന്നാണ് എത്തിക്സ് കമ്മിറ്റി കണ്ടെത്തിയത്.