HMPV Cases In India: ഇന്ത്യയിൽ എച്ച്എംപിവി കേസുകൾ വർധിക്കുന്നു; ചെന്നൈയിൽ രണ്ട് കു‍ഞ്ഞുങ്ങൾക്ക് രോഗം സ്ഥിരീകരിച്ചു

ചെന്നൈ: ചെന്നൈയിലും എച്ച്എംപിവി രോ​ഗബാധ സ്ഥിരീകരിച്ചു. ബെം​ഗളൂരു, ​ഗുജറാത്ത് എന്നിവിടങ്ങൾക്ക് പിന്നാലെയാണ് ചെന്നൈയിലും എച്ച്എംപിവി വൈറസ് ബാധ സ്ഥിരീകരിച്ചത്. തേനംപെട്ട്, ​ഗിണ്ടി എന്നിവിടങ്ങളിലെ രണ്ട് കുട്ടികൾക്കാണ് രോ​ഗബാധ സ്ഥിരീകരിച്ചത്. ചൈനയിൽ എച്ച്എംപിവി (ഹ്യൂമൻ മെറ്റാ ന്യൂമോവൈറസ്) രോ​ഗബാധ വ്യാപകമായി റിപ്പോർട്ട് ചെയ്തതിന് പിന്നാലെയാണ് ഇന്ത്യയിലും രോ​ഗബാധ റിപ്പോർട്ട് ചെയ്തത്.

ആദ്യം ബെം​ഗളൂരുവിൽ രണ്ട് കുട്ടികൾക്കും ​ഗുജറാത്തിൽ ഒരു കുട്ടിക്കുമാണ് രോ​ഗബാധ സ്ഥിരീകരിച്ചത്. നിലവിൽ ആറ് പേർക്കാണ് ഇന്ത്യയിൽ രോ​ഗം സ്ഥിരീകരിച്ചിരിക്കുന്നത്. രോ​ഗം സ്ഥിരീകരിച്ച ആറ് പേരും കുട്ടികളാണ്. ബെം​ഗളൂരുവിൽ രണ്ട് ​ഗുജറാത്തിലും കൊൽക്കത്തയിലും ഒന്നു വീതം ചെന്നൈയിൽ രണ്ട് എന്നിങ്ങനെയാണ് രോ​ഗബാധിതരുടെ കണക്ക്.

2001ലാണ് എച്ച്എംപി വൈറസിനെ കണ്ടെത്തിയതെങ്കിലും ഇതിനായി പ്രത്യേക പരിശോധനകൾ ഇന്ത്യ അടക്കമുള്ള രാജ്യങ്ങളിൽ നടന്നിരുന്നില്ല. കോവിഡ് പോലെ പുതിയ വൈറസ് ബാധയല്ല ഇത്. രാജ്യത്ത് പലർക്കും ഇത് വന്നുപോയിരിക്കാൻ സാധ്യതയുണ്ട്. ജലദോഷപ്പനിയുടെ  ലക്ഷണങ്ങൾ മാത്രമാണ് ഈ രോ​ഗബാധയ്ക്കും ഉള്ളത്.

അപൂർവം കേസുകളിൽ മാത്രമാണ് ഇത് ​ഗുരുതര ആരോ​ഗ്യപ്രശ്നങ്ങളിലേക്ക് നയിക്കുന്നത്. എന്നാൽ, ചൈനയിൽ രോ​ഗബാധ വ്യാപകമാതോടെയാണ് ഇന്ത്യ ഉൾപ്പെടെയുള്ള രാജ്യങ്ങളിൽ പരിശോധന ശക്തമാക്കിയത്. ചൈനയിലെ രോ​ഗസ്ഥിതിവിവര കണക്കുകൾ ലഭ്യമാകുന്ന മുറയ്ക്ക് ലോകാരോ​ഗ്യസംഘടന മറ്റ് രാജ്യങ്ങൾക്കും വിവരങ്ങൾ കൈമാറുന്നുണ്ട്.

അതിനാൽ തന്നെ സമ​ഗ്രമായി സ്ഥിതി വിലയിരുത്തി മുന്നോട്ട് പോകുമെന്നും ആശങ്കപ്പെടേണ്ട സാഹചര്യം നിലവിലില്ലെന്നുമാണ് കേന്ദ്ര ആരോ​ഗ്യമന്ത്രാലയം അറിയിക്കുന്നത്. ഈ വൈറസ് മൂലം ഉണ്ടാകുന്ന ശ്വാസകോശ സംബന്ധമായ അസുഖങ്ങളുടെ സ്ഥിതി വിലയിരുത്തി വരികയാണെന്നും ഇത്തരം രോ​ഗങ്ങളിൽ വലിയ ക്ലസ്റ്ററുകളായുള്ള വർധന ഇന്ത്യയിൽ ഉണ്ടായിട്ടില്ലെന്നും കേന്ദ്ര ആരോ​ഗ്യമന്ത്രാലയം അറിയിച്ചു.