Total Solar Eclipse Today: സൂര്യനെ ചുറ്റി 24 മണിക്കൂറും; എന്നാൽ ആദിത്യ എല്‍ 1ന് ഇന്നത്തെ സമ്പൂർണ്ണ സൂര്യ​ഗ്രഹണം ദൃശ്യമാകില്ല, കാരണം!

ഇനി കുറച്ചു മണിക്കൂറുകളുടെ കാത്തിരിപ്പിനൊടുവിൽ അപൂർവമായ സൂര്യഗ്രഹണത്തിനാണ് ലോകം സാക്ഷിയാകാനായി ഒരുങ്ങുന്നത്. ചന്ദ്രൻ ഭൂമിക്കും സൂര്യനുമിടയിൽ സഞ്ചരിക്കുമ്പോഴാണ് ഒരു പൂർണ്ണ സൂര്യഗ്രഹണം സംഭവിക്കുന്നത്. ഈ സമയത്ത് ഭൂമിയിലെ ജീവജാലങ്ങളിൽ വരെ വലിയ മാറ്റങ്ങളാണ് സംഭവിക്കുക എന്നാണ് ​ഗവേഷകർ നൽകുന്ന സൂചന. പകലിനെ ഇരുട്ട് വന്ന് മൂടുന്ന ഈ പ്രതിഭാസം വടക്കേ അമേരിക്കയുടെ ചില ഭാഗങ്ങളിലാണ് ദൃശ്യമാവുക. ഇനി ഇത്തരമൊരു സമ്പൂർണ്ണ സൂര്യഗ്രഹണം നടക്കണമെങ്കിൽ 126 വർഷങ്ങൾ കാത്തിരിക്കണം. എന്നാൽ ‌‌‌ഈ അപൂർവ്വ സംയോ​ഗം പകർത്താൻ ഇന്ത്യയുടെ ഉപഗ്രഹമായ ആദിത്യ എല്‍ 1 ന് സാധിക്കില്ല എന്നുള്ളതാണ് ഇപ്പോൾ ശ്രദ്ധയാകുന്നത്. 365 ദിവസം 24 മണിക്കൂറും സൂര്യനെ നീരീക്ഷിക്കുന്ന ആദിത്യ എല്‍ 1ന് ഈ അപൂർവ്വ പ്രതിഭാസത്തിന്റെ ദൃശ്യങ്ങൾ പകർത്താനാകാത്തതിന് ഒരു കാരണമുണ്ട്. 

അതേക്കുറിച്ച് ഇന്ത്യൻ സ്പേസ് റിസർച്ച് ഓർഗനൈസേഷൻ (ഐഎസ്ആർഒ) നൽകുന്ന വിശദീകരണം ഇങ്ങനെ. സൂര്യനെ ആഴ്ച്ചയിലെ 7 ദിവസവും സു​ഗ​മമായി വീക്ഷിക്കാൻ സാധിക്കുന്ന വിധത്തിൽ ഭൂമിയിൽ നിന്ന് ഏകദേശം 1.5 ദശലക്ഷം കിലോമീറ്റർ അകലെയുള്ള സൂര്യ-ഭൗമ വ്യവസ്ഥയുടെ ലഗ്രാഞ്ച് പോയിൻ്റ് 1 (L1) ന് ചുറ്റുമുള്ള ഒരു ഹാലോ ഭ്രമണപഥത്തിലാണ്  ആദിത്യ എല്‍ 1 സ്ഥാപിച്ചിരിക്കുന്നത്. ഇക്കാരണം കൊണ്ടു തന്നെ ചന്ദ്രൻ ബഹിരാകാശ പേടകത്തിന് പിന്നിലാണ് നിലകൊള്ളുന്നത്.  ലാഗ്രാഞ്ച് പോയിൻ്റ് 1 ൽ (എൽ 1 പോയിൻ്റ്), ഭൂമിയിൽ ദൃശ്യമാകുന്ന ഗ്രഹണത്തിന് ആ സ്ഥലത്ത് വലിയ പ്രാധാന്യമില്ല. അതിനാൽ ഈ സമ്പൂർണ്ണ സൂര്യ​ഗ്രഹണത്തിന്റെ ദൃശ്യങ്ങൾ ആദിത്യ എല്‍ 1 ന് പകർത്താൻ സാധിക്കില്ല. 

സൂര്യനെ നിരീക്ഷിക്കുന്നതിനായി ഇന്ത്യ നിർമ്മിച്ച ആദ്യത്തെ ഉപ്രഹമാണ് ആദിത്യ L1. ഇതിന് ഏകദേശം 1500 കിലോ​ഗ്രാം ഭാരമുണ്ട്. 400 കോടി ചിലവിലാണ് ഈ സോളാർ ഒബ്സർവേറ്റർ നിർമ്മിച്ചിരിക്കുന്നത്. അതേസമയം യുഎസ്എയിലുടനീളമുള്ള ആളുകൾ ഈ ആകാശ പ്രതിഭാസത്തിന് സാക്ഷ്യം വഹിക്കാൻ സ്കൈ ഡൈവിംഗ് മുതൽ പ്രത്യേക വിമാനങ്ങൾ വരെയുള്ള നിരവധി പരിപാടികളാണ് സംഘടിപ്പിച്ചിരിക്കുന്നത്. 18 മാസത്തിലൊരിക്കൽ ഭൂമിയിൽ എവിടെയെങ്കിലും സൂര്യ​ഗ്രഹണം സംഭവിക്കുന്നുൺണ്ടെന്നാണ് ​ഗവേഷകരുടെ കണ്ടെത്തൽ. പക്ഷെ ഒരു പ്രദേശത്ത് സമ്പൂർണ്ണ സൂര്യ​ഗ്രഹണം സംഭവിക്കുന്നത് 100 വർഷത്തിൽ ഒരിക്കൽ മാത്രമാണ്. സൂര്യനെ ചന്ദ്രൻ പൂർണ്ണമായും മറയ്ക്കുകയും കൊറോണ എന്നറിയപ്പെടുന്ന സൂര്യന്റെ ബാ​ഹ്യവലയം മാത്രം ദൃശ്യമാകുകയും ചെയ്യുമ്പോഴാണ് സമ്പൂർണ സൂര്യഗ്രഹണം സംഭവിച്ചുവെന്ന് പറയാനാകുക.