Truck Bus Collision: ബസും ലോറിയും കൂട്ടിയിടിച്ചുണ്ടായ അപകടത്തിൽ 4 പേർക്ക് ദാരുണാന്ത്യം; 30 പേർക്ക് പരിക്ക്

ചെന്നൈ: തമിഴ്നാട് റാണിപ്പെട്ടിയിൽ ബസും ലോറിയും കൂട്ടിയിടിച്ചുണ്ടായ അപകടത്തിൽ  4 പേർക്ക് ദാരുണാന്ത്യം.  അപകടമുണ്ടായത് കർണാടക ആർടിസി ബസും ലോറിയും കൂട്ടിയിടിച്ചാണ്. 

അപകടത്തിൽ ലോറി ഡ്രൈവർ അടക്കം 4 പേർ മരിച്ചു.  മുപ്പതിലേറെ പേർക്ക് പരിക്കേറ്റിട്ടുണ്ട്. മരിച്ചത് മഞ്ജുനാഥൻ, കൃഷ്ണപ്പ, സോമശേഖർ, ശങ്കര എന്നിവരാണ്. പച്ചക്കറിയുമായി ചെന്നൈയിലേക്ക് വരികയായിരുന്ന ലോറി ബസ്സുമായി കൂട്ടിയിടിക്കുകയായിരുന്നു. 

ഇടിയുടെ ആഘാതത്തിൽ ബസിൻ്റെ മുൻവശം പൂർണ്ണമായും തകർന്നുപോയി. നാലുപേരും സംഭവ സ്ഥലത്തുവെച്ചു തന്നെ മരിച്ചിരുന്നു. മേൽമരുവത്തൂർ ക്ഷേത്രത്തിൽ ദർശനത്തിന് പോയ രണ്ട് കർണാടക സ്വദേശികളും അപകടത്തിൽ മരിച്ചവരിൽ ഉൾപ്പെടുന്നു.  അപകടത്തിൽ പരിക്കേറ്റവർ ആശുപത്രിയിൽ ചികിത്സയിലാണ്. ഇവരിൽ മൂന്നു പേരുടെ നില ഗുരുതരമാണെന്നാണ് റിപ്പോർട്ട്. മരിച്ചവരുടെ മൃതദേഹം ആശുപത്രിയിലേക്ക് മാറ്റിയിട്ടുണ്ട്. പോസ്റ്റുമോർട്ടത്തിന് ശേഷം കുടുംബത്തിന് വിട്ടുനൽകുമെന്നാണ് റിപ്പോർട്ട്. 

കഴിഞ്ഞ ഒരു മാസത്തിനിടെ തമിഴ്‌നാട്ടിൽ റിനിരവധി റോഡപകടങ്ങളാണ് റിപ്പോർട്ട് ചെയ്തത്. ഡിസംബർ 26 ന് ചെന്നൈ-തിരുച്ചി ഹൈവേയിൽ ചെങ്കൽപട്ട് ജില്ലയിലെ പാടാളത്തിന് സമീപം കാർ മറ്റൊരു വാഹനവുമായി കൂട്ടിയിടിച്ചുണ്ടായ അപകടത്തിൽ ഒരാളും രണ്ട് കുട്ടികളും മരിച്ചു.