Maleesha Kharwa: ആഡംബര സൗന്ദര്യ ബ്രാൻഡിന്‍റെ മുഖമായി ധാരാവി ചേരിയിൽ നിന്നുള്ള കൊച്ചു സുന്ദരി മലീഷ ഖർവ
Maleesha Kharwa: മുംബൈയിലെ ധാരാവി ചേരിയിൽ നിന്നുള്ള 14 വയസ്സുകാരി മലീഷ ഖർവ ആഡംബര സൗന്ദര്യ ബ്രാൻഡിന്‍റെ മുഖമായി മാറിയിരിയ്ക്കുകയാണ്..!! മലീഷ ഖർവ ഇന്ന് ആഡംബര സൗന്ദര്യ ബ്രാൻഡായ ഫോറസ്റ്റ് എസൻഷ്യൽസിന്‍റെ പുതിയ ശേഖരത്തിന്‍റെ ആരും ശ്രദ്ധിക്കുന്ന മുഖമാണ്...
Mumbai: 'നിങ്ങള്‍ എവിടെ നിന്ന് വരുന്നു എന്നതല്ല, നിങ്ങളുടെ സ്വപ്നങ്ങള്ക്ക് ചിറകുകള്‍ ഉണ്ടാവണം", 2014 ല്‍ ഓസ്കര്‍ അവാര്‍ഡ്‌ സ്വീകരിയ്ക്കുന്ന അവസരത്തില്‍ കെനിയന്‍ - മെക്സിക്കന്‍ നടി ലുപിറ്റ ന്യോങ് പറഞ്ഞ വാക്കുകള്‍ ആണ് ഇവ... ഇന്ന് അവരുടെ ആ വാക്കുകള്‍ എത്രമാത്രം അര്‍ത്ഥവത്താണ് എന്ന് തെളിയിച്ചിരിയ്ക്കുകയാണ് മുംബൈയിലെ ധാരാവി ചേരിയില്‍ നിന്നുള്ള ഈ കൊച്ചു സുന്ദരി
ഏറെ കഠിനാധ്വാനം ചെയ്‌തിട്ടും നമ്മുടെ സ്വപ്നങ്ങൾ പലപ്പോഴും കൈയ്യെത്താത്തതായി തോന്നുന്ന ഒരു ലോകത്ത്, 14 വയസുകാരിയായ മലീഷ ഖർവയുടെ വിജയ കഥ നമ്മൾ ജീവിതത്തിൽ പ്രതീക്ഷ കൈവിടരുത് എന്നതിന്‍റെ വ്യക്തമായ ഉദാഹരണമാണ്‌. മുംബൈയിലെ ധാരാവി ചേരിയിൽ നിന്നുള്ള 14 വയസ്സുകാരി മലീഷ ഖർവ ആഡംബര സൗന്ദര്യ ബ്രാൻഡിന്‍റെ മുഖമായി മാറിയിരിയ്ക്കുകയാണ്..!! മലീഷ ഖർവ ഇന്ന് ആഡംബര സൗന്ദര്യ ബ്രാൻഡായ ഫോറസ്റ്റ് എസൻഷ്യൽസിന്‍റെ യുവതി ശേഖരത്തിന്‍റെ ആരും ശ്രദ്ധിക്കുന്ന മുഖമാണ്...
മുംബൈയിൽ ഒരു മ്യൂസിക് വീഡിയോ ചിത്രീകരിക്കുകയായിരുന്ന ഹോളിവുഡ് നടൻ റോബർട്ട് ഹോഫ്മാനാണ് 2020ൽ മലീഷ ഖർവയെ കണ്ടെത്തിയത്. ഹോഫ്മാൻ ഉടൻ തന്നെ ഒരു ഇൻസ്റ്റാഗ്രാം അക്കൗണ്ട് തുറക്കുകയും പെൺകുട്ടിക്കായി ഒരു GoFundMe പേജ് തയ്യാറാക്കുകയും ചെയ്തു. ഇന്ന് ഖർവയുടെ ഇൻസ്റ്റാഗ്രാം അക്കൗണ്ടിന് 2.5 ലക്ഷം ഫോളോവേഴ്‌സ് ഉണ്ട്. കൂടാതെ, ഖർവയുടെ അതിശയകരമായ രൂപവും ആകർഷകമായ വ്യക്തിത്വവും അവൾക്ക് ഒന്നിലധികം അവസരങ്ങള്‍ മോഡലിംഗ് രംഗത്ത്‌ നേടിക്കൊടുത്തു. ഖര്‍വയുടെ നേട്ടങ്ങളില്‍ ഏറ്റവും പുതിയത് ആണ് ഫോറസ്റ്റ് എസൻഷ്യൽസിനൊപ്പമുള്ളത്.
“സ്വപ്നങ്ങൾ പലപ്പോഴും കൈയ്യെത്താത്തതായി തോന്നുന്ന ഒരു ലോകത്ത്, @മMaleeshakharwaയുടെ കഥ അവ നൽകുന്ന ശക്തിയുടെ ഓർമ്മപ്പെടുത്തലാണ്. നാല് മാഗസിൻ ഫീച്ചറുകളിൽ വ്യാപിച്ചുകിടക്കുന്ന അവളുടെ കഥ ചൈതന്യത്തിന്‍റെയും പ്രതിരോധത്തിന്‍റെയും ഒന്നാണ്, ”ഫോറസ്റ്റ് എസൻഷ്യൽസ് ഇൻസ്റ്റാഗ്രാമിലെ ഒരു പോസ്റ്റിൽ പറയുന്നു.
“ഈ യാത്രയുടെ ഓരോ ഘട്ടത്തിലും സൗന്ദര്യമുണ്ട്, ഞങ്ങൾ അത് ആഘോഷിക്കുകയാണ്” തങ്ങളുടെ പുതിയ ശേഖരത്തിന്‍റെ മുഖമായി മലീഷ ഖർവയെ തിരഞ്ഞെടുത്ത ശേഷം ആദ്യ വീഡിയോ പങ്കുവെച്ചുകൊണ്ട് ഫോറസ്റ്റ് എസൻഷ്യൽസ് പറഞ്ഞു,
14 കാരിയായ മലീഷ ഖർവ ഫോറസ്റ്റ് എസൻഷ്യൽസിന്‍റെ പുതിയ ശേഖരത്തിന്‍റെ ഉൽപ്പന്നങ്ങൾ പരീക്ഷിക്കുന്ന തരത്തിലാണ് ക്യാമറയ്ക്ക് മുന്നിൽ എത്തുന്നത്‌. നിങ്ങളുടെ സ്വപ്നങ്ങൾ പ്രധാനമാണ് എന്ന സന്ദേശത്തോടെയാണ് ഈ വീഡിയോ അവസാനിക്കുന്നത്.
മലീഷ ഖർവ എന്ന 14 കാരി ഇപ്പോള്‍ വിജയത്തിന്‍റെ പടികള്‍ ഓരോന്നോരോന്നായി കയറുകയാണ്.
സ്റ്റെപ്പ് അപ്പ് 2 എന്ന ചിത്രത്തിലെ പ്രധാന കഥാപാത്രത്തെ അവതരിപ്പിച്ച് പ്രശസ്തനായ ഹോളിവുഡ് നടൻ റോബർട്ട് ഹോഫ്മാന്‍ 2020 ൽ മുംബൈയിൽ മലീഷയെ കണ്ടെത്തിയതോടെ അവളുടെ സ്വപ്നങ്ങള്ക്ക് ചിറക് വയ്ക്കുകയായിരുന്നു. അദ്ദേഹം മലീഷയ്‌ക്കായി ഒരു ഗോ ഫണ്ട് മീ പേജ് ആരംഭിച്ചതോടെ നിരവധി മോഡലിംഗ് അവസരങ്ങള്‍ മലീഷ ഖർവയെ തേടിയെത്തി. അടുത്തിടെ മലീഷ "ലൈവ് യുവർ ഫെയറിടെയിൽ" എന്ന ഹ്രസ്വചിത്രത്തിലും അഭിനയിച്ചിരുന്നു.
അതേസമയം, ഫോറസ്റ്റ് എസൻഷ്യൽസിന്‍റെ സ്ഥാപകയും ചീഫ് മാനേജിംഗ് ഡയറക്ടറുമായ മീര കുൽക്കർണി പറയുന്ന വാക്കുകള്‍ ശ്രദ്ധേയമാണ്. “ഞങ്ങളുടെ യുവതി ശേഖരത്തിലൂടെ, ഞങ്ങൾ മലീഷയുടെ സ്വപ്നങ്ങളെ പിന്തുണയ്ക്കുക മാത്രമല്ല, യുവ മനസ്സുകളെ ശാക്തീകരിക്കുന്നതിനുള്ള പ്രോജക്റ്റ് പാഠശാലയിലും സംഭാവന ചെയ്യുന്നു. യുവതി സെലക്ഷനിൽ നിന്നുള്ള വരുമാനത്തിന്‍റെ 10% പ്രോജക്ട് പാഠശാലയിലേക്ക് ബ്രാൻഡ് സംഭാവന ചെയ്യും, നിർധനരായ, താഴ്ന്ന സാമ്പത്തിക പശ്ചാത്തലത്തിൽ നിന്നുള്ള കുട്ടികൾക്ക് ശോഭയുള്ള ഇന്ത്യയെക്കുറിച്ചുള്ള പ്രതീക്ഷയോടെ വിദ്യാഭ്യാസം ലഭ്യമാക്കും, അവര്‍ പറഞ്ഞു.
"മലീഷ ഇന്ന് ഈ ബ്രാന്‍ഡിന്‍റെ മുഖമാകുമ്പോൾ, ഫോറസ്റ്റ് എസൻഷ്യൽസ് മുന്നിലേക്ക് കൊണ്ടുവരുന്നത് സ്വപ്നങ്ങളുടെ ആശയമാണ്. നിങ്ങൾ എവിടെ നിന്ന് വന്നാലും, നിങ്ങളുടെ സ്വപ്നം എത്ര വലുതായാലും ചെറുതായാലും, സ്വപ്നങ്ങൾ എല്ലാവർക്കും വേണ്ടിയുള്ളതാണ്, എല്ലാ സ്വപ്നങ്ങളും പ്രധാനമാണ്, ”കുൽക്കർണി പറഞ്ഞു.
ചേരിയിലെ രാജകുമാരി എന്നറിയപ്പെടുന്ന ധാരാവിയിൽ നിന്നുള്ള 1 4കാരിയായ മലീഷ ഖർവ ഫാഷന്‍ ലോകത്തെ കൊടുങ്കാറ്റ് ആയി മാറുന്ന അവസരത്തില്‍ രണ്ട് ഹോളിവുഡ് സിനിമകളിലേയ്ക്കുള്ള കരാറിലും ഒപ്പ് വച്ച് കഴിഞ്ഞു...
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...