Omicron: ഒമിക്രോണ്‍ ബാധിതരില്‍ കാണപ്പെടുന്ന സാധരണ ലക്ഷണങ്ങള്‍ എന്തെല്ലാമാണ്? ആരോഗ്യവിദഗ്ധര്‍ പറയുന്നു
കൊറോണയുടെ ഏറ്റവും പുതിയതും വ്യാപന ശേഷി കൂടിയ വകഭേദവുമായ ഒമിക്രോണിന്‍റെ ഭീതിയിലാണ് ഇപ്പോള്‍ ലോകം.
Omicron Symptoms: കൊറോണയുടെ ഏറ്റവും പുതിയതും വ്യാപന ശേഷി കൂടിയ വകഭേദവുമായ ഒമിക്രോണിന്‍റെ ഭീതിയിലാണ് ഇപ്പോള്‍ ലോകം.
70ല്‍ അധികം രാജ്യങ്ങളില്‍ ഇതിനോടകം ഒമിക്രോണ്‍ സ്ഥിരീകരിച്ചിട്ടുണ്ട്. ഇതുവരെ കണ്ടെത്തിയിട്ടില്ലെങ്കിൽപ്പോലും, ഒമിക്രോണ്‍ മിക്കവാറും എല്ലാ രാജ്യങ്ങളിലും എത്തിയതായാണ് കഴിഞ്ഞ ദിവസം WHO മേധാവി വ്യക്തമാക്കിയത്.
ഒമിക്രോണ്‍ ബാധിച്ച പലര്‍ക്കും പ്രത്യേക ലക്ഷണങ്ങള്‍ ഒന്നും തന്നെ ഇല്ലായിരുന്നു എന്നത് രോഗത്തിന്‍റെ ഗൗരവം വര്‍ദ്ധിപ്പിക്കുന്നു.
എന്നാല്‍, ഒമിക്രോണിന്‍റെ ലക്ഷണങ്ങള്‍ പഠന വിധേയമാക്കിയ ശാസ്ത്രജ്ഞർ പറയുന്നത്, രോഗികളിൽ ചില സാധാരണ ലക്ഷണങ്ങള്‍ കാണാം എന്നുതന്നെയാണ്.
Omicron വകഭേദത്തെപ്പറ്റി പഠനം നടത്തിയ ശാസ്ത്രജ്ഞർ പറയുന്നത് കോവിഡ് പോലെതന്നെ ഇതും ശരീരത്തിന്‍റെ രോഗപ്രതിരോധ സംവിധാനത്തെ താറുമാറാക്കും എന്ന് തന്നെയാണ്. അതിനാല്‍, രണ്ട് ഡോസ് വാക്സിന്‍ സ്വീകരിച്ചവരും കൂടുതല്‍ ജാഗ്രത പാലിക്കേണ്ടതുണ്ട്.
എന്നാല്‍, ആരോഗ്യവിദഗ്ധര്‍ നടത്തിയ പുതിയ പഠനങ്ങള്‍ അനുസരിച്ച് ഒമിക്രോണിന്‍റെ ചില പ്രത്യേക ലക്ഷണങ്ങള്‍ കണ്ടെത്തിയിട്ടുണ്ട്. ഒപ്പം ഈ ലക്ഷണങ്ങളെ അവഗണിക്കരുത് എന്ന മുന്നറിയിപ്പും ഇവര്‍ നല്‍കുന്നു.
ഒമിക്രോണ്‍ സ്ഥിരീകരിച്ച രോഗികളില്‍ അല്പം വ്യത്യസ്തമായ ലക്ഷണങ്ങള്‍ കാണുന്നുണ്ട് എങ്കിലും തൊണ്ട വേദന (ഇടര്‍ച്ച) മൂക്കടപ്പ് എന്നിവ സാധാരണമായ തുടക്കലക്ഷണമാണ്. UKയില്‍ പഠനം നടത്തിയ രോഗികളിലും ജലദോഷം ഒരു സാധാരണ ലക്ഷണമാണ് എന്ന് കണ്ടെത്തിയിരുന്നു.
ഒമിക്രോണിന്‍റെ ചില പ്രത്യേക ലക്ഷണങ്ങള്‍ ഇവയാണ് (Omicron Symptoms)
വരണ്ട ചുമ: ഒമിക്രോണ്‍ ബാധിച്ച ആളുകൾക്ക് വരണ്ട ചുമ അനുഭവപ്പെടാം. ദക്ഷിണാഫ്രിക്കയിലെ ആരോഗ്യ വകുപ്പിന്‍റെ അഭിപ്രായത്തിൽ, ഒമിക്രോൺ ബാധിച്ച ആളുകൾക്ക് വരണ്ട ചുമ ഉണ്ടാകാം. കോവിഡ്- 19ന്‍റെ ലക്ഷണങ്ങളിലും ഇത് പ്രകടമായിരുന്നു.
ക്ഷീണം: മറ്റ് വകഭേദങ്ങളെപ്പോലെ ഒമിക്രോണ്‍ ബാധിക്കുന്നവര്‍ക്കും കടുത്ത ക്ഷീണം ഉണ്ടാകും. കടുത്ത ക്ഷീണം, ഊര്‍ജ്ജമില്ലായ്മ, വിശ്രമിക്കാനുള്ള ശക്തമായ ആഗ്രഹം എന്നിവ അനുഭവപ്പെടാം. ഇത് നമ്മുടെ ദൈനംദിന പ്രവർത്തനങ്ങളെ തടസപ്പെടുത്താം. ഈ അവസ്ഥ അഭിമുഖീകരിക്കുന്നവര്‍ ഒരു ഡോക്ടറെ കാണുന്നത് ഉറപ്പാക്കുക.
തൊണ്ട വേദന (ഇടര്‍ച്ച): ദക്ഷിണാഫ്രിക്കൻ ഡോക്ടർ ആഞ്ചലിക് കോറ്റ്‌സി പറയുന്നതനുസരിച്ച്, ഒമിക്രോൺ ബാധിച്ച രോഗികൾക്ക് തൊണ്ടവേദനയോ അതിന് സമാനമായ തൊണ്ട പോറൽ പോലെയുള്ള പ്രശ്‌നമാണ് കാണുന്നത്. ഈ രണ്ട് അവസ്ഥകളും ഒരു പരിധിവരെ സമാനമായിരിക്കാമെങ്കിലും, തൊണ്ടയിലെ പോറൽ പ്രശ്നം കൂടുതൽ വേദനാജനകമായിരിയ്ക്കും.
നേരിയ പനി: കൊറോണ വൈറസ് ആരംഭിച്ചതു മുതൽ റിപ്പോർട്ട് ചെയ്യപ്പെട്ട പ്രധാന ലക്ഷണങ്ങളിൽ ഒന്നാണ് പനി. എന്നാൽ ഒമിക്രോണിന്‍റെ പനി കടുത്തതാവില്ല എന്നാല്‍ കൂടുതല്‍ ദിവസങ്ങള്‍ നീണ്ടു നില്‍ക്കും എന്നാണ് പഠനങ്ങള്‍ പറയുന്നത്.
രാത്രിയില്‍ അമിത വിയർപ്പ്: ദക്ഷിണാഫ്രിക്കയിലെ ആരോഗ്യ വകുപ്പിലെ ഡോക്ടർമാര്‍ പറയുന്നതനുസരിച്ച് രാത്രിയില്‍ ഉണ്ടാകുന്ന അമിത വിയര്‍പ്പ് ഈ രോഗത്തിന്‍റെ ലക്ഷണങ്ങളാണ്. അതേ സമയം, ഏറ്റവുമധികം ആശ്ചര്യപ്പെടുത്തുന്ന കാര്യം, ഈ രോഗം ബാധിച്ച ഒരാൾ എസി പ്രവർത്തിപ്പിച്ചോ തണുത്ത സ്ഥലത്തോ ഉറങ്ങിയാലും അയാൾ വിയർക്കുന്നു എന്നതാണ്.
ഒമിക്രോണിന്‍റെ ഏറ്റവുമൊടുവില്‍ പുറത്തുവന്ന ഈ ലക്ഷണങ്ങള്‍ ശ്രദ്ധിക്കുക. സംശയം തോന്നുന്നപക്ഷം ഉടന്‍ തന്നെ ആരോഗ്യ വിദഗ്ധരെ സമീപിക്കുക.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...