PM Modi Kuwait Visit: 43 വർഷത്തിനിടെ ഇതാദ്യം; ദ്വിദിന സന്ദർശനത്തിനായി പ്രധാനമന്ത്രി കുവൈത്തിലേക്ക്

ന്യൂഡൽഹി: ദ്വിദിന സന്ദർശനത്തിനായി പ്രധാനമന്ത്രി നരേന്ദ്ര മോദി ഇന്ന് കുവൈത്തിലേക്ക്. 43 വർഷങ്ങൾക്ക് ശേഷം ഇതാദ്യമായാണ് ഒരു ഇന്ത്യൻ പ്രധാനമന്ത്രി കുവൈറ്റ് സന്ദർശിക്കുന്നത് എന്നത് ശ്രദ്ധേയം.  പ്രധാനമന്ത്രി മോദിക്ക് കുവൈറ്റിൽ ആചാരപരമായ സ്വീകരണം നൽകും.

കുവൈത്ത് ഭരണാധികാരി ഷെയ്ഖ് മെഷാൽ അൽ അഹമ്മദ് അൽ ജാബർ അൽ സബാഹിന്റെ ക്ഷണപ്രകാരമാണ് പ്രധാനമന്ത്രി കുവൈത്തിലേക്ക് പോകുന്നത്. സെപ്തംബറിൽ കുവൈത്ത് കിരീടാവകാശിയുമായി പ്രധാനമന്ത്രി കൂടിക്കാഴ്ച നടത്തിയിരുന്നു. ഡിസംബർ 21, 22 തീയതികളിലാണ് പ്രധാനമന്ത്രി കുവൈറ്റ് സന്ദർശിക്കുന്നതെന്ന് വിദേശകാര്യ മന്ത്രാലയം അറിയിച്ചിട്ടുണ്ട്.  വർഷങ്ങൾക്ക് ശേഷം ഒരു ഇന്ത്യൻ പ്രധാനമന്ത്രിയുടെ കുവൈത്ത് സന്ദർശനം വലിയ പ്രാധാന്യത്തോടെയാണ് നോക്കികാണുന്നത്.

ഇന്ത്യയും കുവൈത്തും തമ്മിലുള്ള ഉഭയകക്ഷി ബന്ധത്തിൽ ഈ സന്ദർശനം പുതിയ അധ്യായത്തിന് തുടക്കം കുറിക്കും എന്നാണ് പ്രതീക്ഷ. പ്രതിരോധം, വ്യാപാരം, മറ്റ് മേഖലകൾ എന്നിവയിൽ ഇരു രാജ്യങ്ങളും തമ്മിലുള്ള പങ്കാളിത്തം കൂടുതൽ ശക്തിപ്പെടുത്തുന്നത് സംബന്ധിച്ച് ഈ സന്ദർശന വേളയിൽ ചർച്ചകൾ നടക്കുമെന്നും എംഇഎ അറിയിച്ചിട്ടുണ്ട്. കുവൈത്ത് കിരീടാവകാശി സ്മഘടിപ്പിക്കുന്ന വിരുന്നു സൽക്കാരത്തിലും പ്രധാനമന്ത്രി പങ്കെടുക്കും.

കുവൈറ്റ് അമീർ ഷെയ്ഖ് മഷാൽ അൽ അഹമ്മദ് അൽ ജാബർ അൽ സബാഹാണ് പ്രധാനമന്ത്രി മോദിക്ക് ഈ ക്ഷണം നൽകിയത്. സന്ദർശന വേളയിൽ പ്രധാനമന്ത്രി കുവൈത്തിലെ ഉന്നത നേതൃത്വവുമായി കൂടിക്കാഴ്ച നടത്തുകയും അവിടെ താമസിക്കുന്ന ഇന്ത്യൻ സമൂഹത്തിലെ ജനങ്ങളുമായി സംവദിക്കുകയും ചെയ്യുമെന്നും റിപ്പോർട്ടുണ്ട്. പ്രധാനമന്ത്രിയുടെ ഈ ചരിത്രപരമായ സന്ദർശനം ഇന്ത്യ-കുവൈത്ത് ബന്ധത്തിൽ പുത്തൻ അധ്യായം കുറയ്ക്കുമെന്ന് വിദേശകാര്യ മന്ത്രാലയ സെക്രട്ടറി അരുൺ കുമാർ ചാറ്റർജി പറഞ്ഞു.