Rahul Gandhi: മനുസ്മൃതിയാണ് പിന്തുടരേണ്ടതെന്ന് സവർക്കർ പറഞ്ഞതിനെ അനുകൂലിക്കുന്നുണ്ടോ; ആർഎസ്എസിനും ബിജെപിക്കുമെതിരെ ആഞ്ഞടിച്ച് രാഹുൽ ​ഗാന്ധി

ന്യൂഡൽഹി: സവർക്കറുടെ ഭരണഘടനയ്ക്കെതിരായ വാക്കുകൾ പാർലമെന്റിൽ കേന്ദ്ര സർക്കാരിനെതിരെ ആയുധമാക്കി പ്രതിപക്ഷ നേതാവ് രാഹുൽ ​ഗാന്ധി. ഇന്ത്യയുടേതായി ഒന്നും ഭരണഘടനയിൽ ഇല്ലെന്ന് പറഞ്ഞവരാണ് ആർഎസ്എസ് നേതാക്കൾ. സവർക്കർ പറഞ്ഞത് മനുസ്മൃതിയാണ് പിന്തുടരേണ്ടതെന്നാണെന്ന് രാഹുൽ ​ഗാന്ധി ആരോപിച്ചു.

ബിജെപി സവർക്കറിന്റെ അഭിപ്രായത്തെ പിന്തുണയ്ക്കുന്നുണ്ടോയെന്ന് വ്യക്തമാക്കണം. ഭരണഘടനയുടെ അന്തസത്ത ഒരുകൂട്ടം ആശയങ്ങളാണ്. അതിൽ ​ഗാന്ധിയുടെയും അംബേദ്കറിന്റെയും നെഹ്റുവിന്റെയും ആശയങ്ങൾ അടങ്ങിയിട്ടുണ്ടെന്നും രാഹുൽ ​ഗാന്ധി വ്യക്തമാക്കി. ദ്രോണാചാര്യൻ ഏകലവ്യന്റെ വിരൽമുറിച്ചത് പോലെ ഇന്ത്യയുടെ വിരൽ മുറിക്കുകയാണ് ബിജെപി.

യുവാക്കളുടെ പ്രതീക്ഷയാകുന്ന വിരലും കർഷകരുടെ വിരലും ബിജെപി മുറിക്കുന്നു. ഹത്രാസിൽ പെൺകുട്ടിയെ ബലാത്സം​ഗം ചെയ്ത ആളുകൾ സുഖമായി നടക്കുന്നു. ആ പെൺകുട്ടിയെ പുനരധിവസിപ്പിക്കാൻ നാല് വർഷമായിട്ടും കഴിഞ്ഞിട്ടില്ലെന്നും രാഹുൽ ​ഗാന്ധി ആരോപിച്ചു. യുപിയിൽ നടപ്പാക്കുന്നത് ഭരണ​ഘടനയല്ല, മനുസ്മൃതിയാണെന്നും രാഹുൽ ​ഗാന്ധി വിമർശിച്ചു.