Arjun Mission: റിട്ട. മേജർ ജനറൽ ഇന്ദ്രബാലൻ ഷിരൂരിലെത്തും; ആവശ്യമെങ്കിൽ നാവികസേനയുടെ സഹായം തേടുമെന്ന് ഉത്തരകന്നഡ ജില്ലാ കളക്ടർ

ബെം​ഗളൂരു: ഷിരൂരിൽ മണ്ണിടിച്ചിലിൽ കാണാതായ മലയാളി ലോറി ഡ്രൈവർ അർജുൻ ഉൾപ്പെടെയുള്ളവർക്കായി നാളെ മുതൽ ഷിരൂരിൽ തിരച്ചിൽ ഊർജ്ജിതമാക്കും. റിട്ടയേർഡ് മേജർ ജനറൽ എം ഇന്ദ്രബാലൻ തിരച്ചിലിന്റെ ഭാ​ഗമാകാൻ നാളെ ഷിരൂരിൽ എത്തും. ഡ്രഡ്ജിം​ഗ് കമ്പനി പത്ത് ദിവസം കൂടി ഷിരൂരിൽ തുടരുമെന്ന് അറിയിച്ചിട്ടുണ്ട്.

തിരച്ചിലിനായി ആവശ്യമെങ്കിൽ നാവിക സേനയുടെ സഹായം തേടുമെന്ന് ഉത്തര കന്നഡ ജില്ലാ കളക്ടർ അറിയിച്ചു. നാളെ മുതൽ തിരച്ചിൽ ഊർജ്ജിതമാക്കാനാണ് ജില്ലാ ഭരണകൂടത്തിന്റെ തീരുമാനം. മുമ്പത്തെ റഡാർ പരിശോധനാ ഫലങ്ങൾ തിരച്ചിലിന് ഉപയോ​ഗിക്കുമെന്നും ഇനി റഡാർ പരിശോധന ഉണ്ടാകില്ലെന്നും ഇന്ദ്രബാലൻ പറഞ്ഞു.

മണ്ണ് നീക്കം ദുഷ്കരമാണ്. ലോറിക്ക് മുകളിലുള്ള മണ്ണ് ഡ്രഡ്ജർ ഉപയോ​ഗിച്ച് നീക്കുന്നത് ദുഷ്കരമാണെന്നാണ് വിലയിരുത്തൽ. ഇന്ന് തിരച്ചിൽ നടത്തിയത് നാവികസേന അടയാളപ്പെടുത്തിയ ​ഗം​ഗാവലിപ്പുഴയിലെ കോൺടാക്ട് പോയിന്റ് ത്രീ കേന്ദ്രീകരിച്ചാണ്. ഡ്രഡ്ജിങ് കമ്പനിയുടെ ഡൈവർമാർ ഒരു ലോറിയുടെ എഞ്ചിൻ കണ്ടെത്തിയിരുന്നു.

എന്നാൽ, അത് അർജുൻ ഓടിച്ചിരുന്ന ലോറിയുടേത് അല്ലെന്ന് ലോറി ഉടമ മനാഫ് സ്ഥിരീകരിച്ചു. പുഴയ്ക്കടിയിൽ നിന്ന് കണ്ടെത്തിയ സ്കൂട്ടർ ഷിരൂരിൽ ചായക്കട നടത്തിയിരുന്ന ലക്ഷ്മണിന്റെ ഭാര്യയുടേതാണെന്ന് സ്ഥിരീകരിച്ചു. ഡ്രഡ്ജർ ഉപയോ​ഗിച്ച് പുഴയുടെ അടിത്തട്ടിലെ മണ്ണ് കൂടുതൽ നീക്കം ചെയ്താലേ തിരച്ചിലിൽ പ്രതീക്ഷയുണ്ടാകൂ.