Delhi Pollution: ഡല്‍ഹിയില്‍ വായു മലിനീകരണം ഗുരുതരം, സ്കൂളുകള്‍ക്ക് 2 ദിവസം അവധി

Delhi Pollution Update: ദേശീയ തലസ്ഥാനത്ത് വായു മലിനീകരണ തോത് ക്രമാതീതമായി വര്‍ദ്ധിക്കുന്ന സാഹചര്യത്തിൽ അടിയന്തിര നടപടി സ്വീകരിച്ച് ഡല്‍ഹി സര്‍ക്കാര്‍. രാജ്യ തലസ്ഥാനത്തെ സ്കൂളുകള്‍ക്ക് 2 ദിവസത്തെ അവധി പ്രഖ്യാപിച്ചു. 

ഡൽഹിയില്‍ അഞ്ചാം ക്ലാസ് വരെയാണ് ഈ അവധി ബാധകമാവുക. മലിനീകരണ തോത് ഉയരുന്ന സാഹചര്യത്തിൽ ഡൽഹിയിലെ എല്ലാ സർക്കാർ, സ്വകാര്യ പ്രൈമറി സ്‌കൂളുകൾക്കും അടുത്ത 2 ദിവസത്തേക്ക് അവധിയായിരിക്കുമെന്ന് ഡൽഹി മുഖ്യമന്ത്രി അരവിന്ദ് കെജ്‌രിവാൾ ട്വീറ്റ് ചെയ്തു.

രാജ്യതലസ്ഥാനത്തും സമീപ പ്രദേശങ്ങളിലുമുള്ള വായുവിന്‍റെ ഗുണനിലവാരം ഗുരുതരമായ വിഭാഗത്തിലേക്ക് കടന്നതോടെയാണ് നിര്‍ണ്ണായക നടപടി സര്‍ക്കാര്‍ സ്വീകരിച്ചത്. ഡൽഹിയില്‍  വ്യാഴാഴ്ച GRAP III നടപ്പാക്കി. GRAP സ്റ്റേജ്-III നടപ്പിലാക്കിയതിന്‍റെ ഭാഗമായാണ് അഞ്ചാം ക്ലാസ് വരെയുള്ള കുട്ടികള്‍ക്ക് അവധി പ്രഖ്യാപിച്ചത്. കൂടാതെ കെട്ടിട നിര്‍മ്മാണ പ്രവർത്തനങ്ങള്‍ക്കും കൂടുതൽ കർശനമായ നിയന്ത്രണങ്ങൾ നടപ്പിലാക്കും. 

റിപ്പോര്‍ട്ട് അനുസരിച്ച് വ്യാഴാഴ്ച വൈകുന്നേരത്തോടെ ഡൽഹിയിലെ AQI 402-ൽ എത്തി, അത് 'കടുത്ത' വിഭാഗത്തിൽപ്പെടും. (401-450).

അതേസമയം, വർദ്ധിച്ചുവരുന്ന മലിനീകരണവും വായുവിന്‍റെ ഗുണനിലവാരം മോശമായതും മൂലം അടുത്ത 15 ദിവസങ്ങൾ നിർണായകമാകുമെന്ന് ഡൽഹി പരിസ്ഥിതി മന്ത്രി ഗോപാൽ റായ് വ്യക്തമാക്കി. കേന്ദ്ര സർക്കാരും സംസ്ഥാന സർക്കാരും ഈ വിഷയത്തില്‍ സഹകരിക്കണമെന്നും സ്ഥിതിഗതികൾ നിയന്ത്രിക്കാൻ ഒറ്റക്കെട്ടായി പ്രവർത്തിക്കേണ്ടതുണ്ട് എന്നും എല്ലാവരും അതിനെക്കുറിച്ച് ബോധവാന്മാരായിരിക്കണമെന്നും അദ്ദേഹം പറഞ്ഞു.