Secundarabad Shalimar Express: പശ്ചിമ ബംഗാളിൽ സെക്കന്തരാബാദ്-ഷാലിമർ എക്‌സ്പ്രസിൻ്റെ 3 കോച്ചുകൾ പാളം തെറ്റി

കൊൽക്കത്ത: പശ്ചിമ ബംഗാളിൽ ട്രെയിൻ പാളം തെറ്റി. ഹൗറയിലെ നാഗ്പൂർ സ്റ്റേഷന് സമീപമാണ് ട്രെയിൻ അപകടമുണ്ടായത്. ട്രെയിന്റെ മൂന്ന് കോച്ചുകൾ പാളം തെറ്റിയതായി അധികൃതർ അറിയിച്ചു. 

അപകടത്തിൽ ആളപായമില്ലെന്നും ഇതുവരെ റിപ്പോർട്ട് ചെയ്തിട്ടില്ല. ഇന്ന് പുലർച്ചെയായിരുന്നു അപകടം നടന്നത്. ഡൗൺ ലൈനിൽ നിന്നും ടോപ്പ് ലൈനിലേക്ക് കയറുന്നതിനിടെ പാളം തെറ്റിയതാണെന്നാണ് പ്രാഥമിക നിഗമനം.

അപകടത്തിൽ പെട്ടത് രണ്ട് പാസഞ്ചർ കോച്ചുകളും ഒരു പാഴ്‌സൽ വാനുമാണ്. യാത്രക്കാരെ കോച്ചുകളിൽ നിന്ന് സുരക്ഷിതരായി പുറത്തിറക്കി. ആർക്കും പരിക്കേറ്റിട്ടില്ലെന്ന് റെയിൽവേ അധികൃതർ വ്യക്തമാക്കിയിട്ടുമുണ്ട്. സംഭവത്തിൽ അന്വേഷണം ആരംഭിച്ചിട്ടുണ്ട്.

സംഭവസ്ഥലത്തേക്ക് ദുരിതാശ്വാസത്തിനായി സന്ത്രാഗച്ചി, ഖരഗ്പൂർ എന്നിവിടങ്ങളിൽ നിന്നുള്ള മെഡിക്കൽ റിലീഫ് ട്രെയിനുകളും ഉടൻ അയച്ചതായി റെയിൽവേ അറിയിച്ചിരുന്നു. യാത്രക്കാരെ കൊൽക്കത്തയിലേക്ക് കൊണ്ടുപോകാൻ ബസുകളും അയച്ചിട്ടുണ്ട്.  കഴിഞ്ഞ അഞ്ച് വർഷത്തിനിടെ 200 റെയിൽവേ അപകടങ്ങളിലായി 351 പേരുടെ ജീവൻ പൊലിയുകയും 970 പേർക്ക് പരിക്കേൽക്കുകയുമുണ്ടായി.