Liquor Policy Case: കെജ്‌രിവാളിനെ പ്രോസിക്യൂട്ട് ചെയ്യാം; ഇഡിക്ക് അനുമതി

ന്യൂഡൽഹി: മദ്യനയ കേസിൽ ഡൽഹി മുൻ മുഖ്യമന്ത്രിയും ആം ആദ്മി പാർട്ടി നേതാവുമായ അരവിന്ദ് കെജ്‌രിവാളിനെ ഇഡി പ്രോസിക്യൂട്ട് ചെയ്യും. ഇതിനുള്ള അനുമതി ഡൽഹി ലഫ്റ്റനൻ്റ് ഗവർണർ വികെ സക്‌സേനയിൽ നിന്ന് ഇഡിയ്ക്ക് ലഭിച്ചു. 

നിർണായകമായ ഡൽഹി നിയമസഭാ തിരഞ്ഞെടുപ്പിന് ആഴ്‌ചകൾ മുന്നോടിയായാണ് ഈ നീക്കം. ബിജെപിക്ക് മുന്നിൽ നാലാം തവണയും അധികാരം ഉറപ്പിക്കാൻ എഎപി ശ്രമം നടത്തുന്നതിനിടെയാണ് കെജ്‌രിവാളിനെ പ്രോസിക്യൂട്ട് ചെയ്യാൻ ഇഡിക്ക് അനുമതി ലഭിക്കുന്നത്. 2021-22 വർഷത്തെ എക്സൈസ് നയത്തിലെ ക്രമക്കേടുമായി ബന്ധപ്പെട്ട് ഡിസംബർ 5 ന് കെജ്‌രിവാളിനെ പ്രോസിക്യൂട്ട് ചെയ്യാൻ ഇഡി ലഫ്റ്റനൻ്റ് ഗവർണറുടെ അനുമതി തേടിയിരുന്നു. സൗത്ത് ഗ്രൂപ്പുമായി ചേര്‍ന്ന് കെജ്‌രിവാൾ ഗുരുതര അഴിമതി നടത്തിയതിന് തെളിവുണ്ടെന്നും പ്രോസിക്യൂട്ട് ചെയ്യാന്‍ അനുമതി നല്‍കണമെന്നും ആവശ്യപ്പെട്ടായിരുന്നു ഇഡി ലഫ് ഗവര്‍ണ്ണര്‍ക്ക് കത്ത് നല്‍കിയത്.

ഡൽഹി നിയമസഭാ തിരഞ്ഞെടുപ്പിനുള്ള നാലാമത്തേതും അവസാനത്തേതുമായ 38 സ്ഥാനാർത്ഥികളുടെ പട്ടിക ഞായറാഴ്ച ആം ആദ്മി പാർട്ടി പുറത്തിറക്കിയിരുന്നു. എഎപി നേതാവ് അരവിന്ദ് കേജ്‌രിവാൾ ന്യൂഡൽഹി മണ്ഡലത്തിൽ നിന്നുമാണ് മത്സരിക്കുന്നത്. മുഖ്യമന്ത്രി അതിഷി കൽക്കാജിയിൽ നിന്നും വീണ്ടും മത്സരിക്കും. സൗരഭ് ഭരദ്വാജ് ഗ്രേറ്റർ കൈലാഷിൽ നിന്നും ആം ആദ്മിയെ പ്രതിനിധീകരിക്കും. കസ്തൂർബാ നഗറിലെ നിലവിലെ എംഎൽഎയായ മദൻ ലാലിനെ മാറ്റി രമേഷ് പെഹൽവാനെ സ്ഥാനാർത്ഥിയാക്കി.