Tungabhadra Dam: കർണാടകയിൽ തും​ഗഭ​ദ്ര ഡാമിന്റെ ​ഗേറ്റ് തകർന്ന് വൻ തോതിൽ വെള്ളം പുറത്തേക്ക്; ജാ​ഗ്രത

ബെം​ഗളൂരു: കർണാടകയിലെ കൊപ്പൽ ജില്ലയിലെ തും​ഗഭദ്ര അണക്കെട്ടിന്റെ ​ഗേറ്റ് തകർന്ന് വൻതോതിൽ വെള്ളം പുറത്തേക്ക് ഒഴുകുന്നു. പത്തൊൻപതാമത്തെ ഷട്ടറിന്റെ ചങ്ങലയാണ് പൊട്ടിയത്. ശനിയാഴ്ച രാത്രിയോടെയാണ് അപകടമുണ്ടായത്. ഇതേ തുടർന്ന് ഡാമിൽ നിന്ന് വൻതോതിൽ വെള്ളം പുറത്തേക്ക് ഒഴുക്കുകയാണ്.

ഇതിനകം ഒരു ലക്ഷത്തോളം ക്യൂസെക്സ് വെള്ളം പുറത്തേക്ക് ഒഴുക്കിവിട്ടതായാണ് വിവരം. അണക്കെട്ടിന്റെ സുരക്ഷ ഉറപ്പുവരുത്തുന്നതിനായി 33 ​ഗേറ്റുകളും തുറന്നുവിട്ടിരിക്കുകയാണ്. ഇതേ തുടർന്ന് കൊപ്പൽ, വിജയന​ഗര, ബെല്ലാരി, റായ്ച്ചൂർ ജില്ലകളിൽ അതീവ ജാ​ഗ്രത നിർദേശം നൽകിയിട്ടുണ്ട്.

ഡാമിൽ നിന്ന് 60,000 മില്യൺ ക്യൂബിക് ഫീറ്റ് വെള്ളം പുറത്തേക്ക് ഒഴുക്കിവിടണമെന്നും എന്നാൽ മാത്രമേ ഷട്ടറുമായി ബന്ധപ്പെട്ട അറ്റകുറ്റപ്പണികൾ നടത്താൻ സാധിക്കൂവെന്നുമാണ് ഉദ്യോ​ഗസ്ഥരെ ഉദ്ധരിച്ച് ഡെക്കാൺ ഹെറാൾഡ് റിപ്പോർട്ട് ചെയ്യുന്നത്. കഴിഞ്ഞ 70 വർഷത്തിനിടെ ഇതാദ്യമായാണ്  ഇത്തരത്തിലൊരു അപകടം അണക്കെട്ടിലുണ്ടാകുന്നത്.