US Election 2024: ലോക സമാധാനത്തിനായി ഒരുമിച്ച് പ്രവർത്തിക്കാം; `പ്രിയ സുഹൃത്ത്` ട്രംപിനെ അഭിനന്ദിച്ച് നരേന്ദ്ര മോദി

അമേരിക്കയുടെ 47ാമത് പ്രസിഡന്റായ അധികാരത്തിലെത്തിയ റിപ്പബ്ലിക്കൻ സ്ഥാനാ‍ർത്ഥി ഡോണാൾഡ് ട്രംപിനെ അഭിനന്ദിച്ച് പ്രധാനമന്ത്രി നരേന്ദ്ര മോദി. തിരഞ്ഞെടുപ്പിൽ ചരിത്രവിജയം സ്വന്തമാക്കിയ പ്രിയ സുഹൃത്തിന് ഹൃദയം നിറഞ്ഞ അഭിനന്ദനങ്ങളെന്ന് അദ്ദേഹം സമൂഹമാധ്യമമായ എക്സിൽ കുറിച്ചു.

ഇന്ത്യയും യുഎസും തമ്മിലുള്ള സമഗ്രമായ ആഗോള, തന്ത്രപരമായ പങ്കാളിത്തം കൂടുതൽ ശക്തിപ്പെടുത്തുന്നതിന് ആഗ്രഹിക്കുന്നുവെന്നും ജനങ്ങളുടെ ഉന്നമനത്തിനും ആഗോള സമാധാനം, സ്ഥിരത, സമൃദ്ധി എന്നിവ പ്രോത്സാഹിപ്പിക്കുന്നതിനും ഒരുമിച്ച് പ്രവർത്തിക്കാമെന്നും നരേന്ദ്ര മോദി പറഞ്ഞു. 

ഇലക്ടറൽ - പോപ്പുലർ വോട്ടിന് പുറമേ സെനറ്റും കീഴടക്കിയാണ് ട്രംപ് തേരോട്ടം നടത്തിയത്. റിപ്പബ്ലിക്കൻ സ്ഥാനാ‍ത്ഥിയായ ഡോണാൾഡ് ട്രംപ് 267 ഇലക്ടറൽ വോട്ടുകൾ നേടിയപ്പോൾ ഡെമോക്രാറ്റിക് സ്ഥാനാർത്ഥി കമല ഹാരിസിന് 224 വോട്ടുകളാണ് ലഭിച്ചത്. 

പുറത്ത് വന്ന ഫലങ്ങൾ പ്രകാരം 68,760,238 (51.2%) പോപ്പുലർ വോട്ടുകളാണ് ട്രംപ് സ്വന്തമാക്കിയത്. കമലഹാരിസിന് 63,707,818 (47.4%) പോപ്പുലർ വോട്ടുകൾ ലഭിച്ചു. സെനറ്റില്‍ റിപ്പബ്ലിക്കന്‍ പാര്‍ട്ടി 51 സീറ്റ് നേടിയപ്പോള്‍ ഡെമോക്രാറ്റുകള്‍ 42 സീറ്റിലാണ് ജയിച്ചത്.