Money Seized In Cheruthuruthi: ചെറുതുരുത്തിയിൽ പണം പിടികൂടിയ സംഭവം; സിസി ജയന്റെ വീട്ടിൽ പോലീസ്-ഐടി റെയ്ഡ്, അഞ്ച് ലക്ഷം രൂപ കൂടി കണ്ടെത്തി

പാലക്കാട്: ചെറുതുരുത്തിയിൽ രേഖകളില്ലാതെ കാറിൽ കടത്തിയ പണം പിടികൂടിയ സംഭവത്തിൽ പോലീസ് ഐടി റെയ്ഡ്. കാറിൽ പണം കൊണ്ടുപോയ സിസി ജയന്റെ വീട്ടിലാണ് റെയ്ഡ് നടത്തുന്നത്. പണം പിടികൂടിയ കാറിലുണ്ടായിരുന്നത് സിസി ജയനും മകനും ഡ്രൈവറും. സിസി ജയന്റെ കുളപ്പുള്ളിയിലെ വീട്ടിലാണ് പോലീസും ഇൻകം ടാക്സ് ഡിപ്പാർട്ട്മെന്റും പരിശോധന നടത്തുന്നത്.

വീട്ടിൽ നടത്തിയ പരിശോധനയിൽ അഞ്ച് ലക്ഷം രൂപ കൂടി കണ്ടെത്തി. പാലക്കാട് കൊളപ്പുള്ളിയിലെ വീട്ടിൽ നടത്തിയ റെയ്ഡിലാണ് പണം കണ്ടെത്തിയത്. കണക്കിൽപ്പെടാത്ത 19.70 ലക്ഷം രൂപയാണ് രാവിലെ കാറിൽ നിന്ന് പിടികൂടിയത്. ചെറുതുരുത്തി കലാമണ്ഡലത്തിന് മുൻപിൽ തെരഞ്ഞെടുപ്പ് സ്ക്വാഡ് നടത്തിയ വാഹന പരിശോധനയിലാണ് പണം പിടികൂടിയത്.

തുടർനടപടികൾക്കായി ഇൻകം ടാക്സിന് പണം കൈമാറി. എൽഡിഎഫിന് വേണ്ടി കടത്തിയ പണമാണ് പിടികൂടിയതെന്ന് പിവി അൻവർ എംഎൽഎ ആരോപിച്ചിരുന്നു. ചേലക്കര മണ്ഡലത്തിന്റെ അതിർത്തി പ്രദേശമായ ചെറുതുരുത്തിയിൽ തെരഞ്ഞെടുപ്പ് സ്ക്വാഡ് രാവിലെ മുതൽ പരിശോധന ആരംഭിച്ചിരുന്നു. ഈ പരിശോധനയ്ക്കിടെയാണ് കാറിൽ കടത്തിയ രേഖകളില്ലാത്ത പണം പിടികൂടിയത്.

ഏതെങ്കിലും രാഷ്ട്രീയ പാർട്ടിയുടെ തെരഞ്ഞെടുപ്പ് ആവശ്യങ്ങൾക്കായി കടത്തിയ കള്ളപ്പണം ആണോ ഇതെന്നാണ് തെരഞ്ഞെടുപ്പ് സ്ക്വാഡ് പ്രധാനമായും പരിശോധിക്കുന്നത്. അതേസമയം, എറണാകുളത്തേക്ക് പർച്ചേസ് ആവശ്യങ്ങൾക്കായി കൊണ്ടുപോയ പണമാണിതെന്നാണ് വാഹനത്തിൽ ഉണ്ടായിരുന്നവർ നൽകുന്ന വിശദീകരണം. തെരഞ്ഞെടുപ്പ് സ്ക്വാഡ് ഇവരുടെ വാദം മുഖവിലയ്ക്കെടുത്തിട്ടില്ല. സംഭവത്തിൽ അന്വേഷണം തുടരുകയാണ്.