Snake Bites Passenger: ട്രെയിനിൽ നിന്ന് യുവാവിനെ കടിച്ചത് പാമ്പ് തന്നെ; സ്ഥിരീകരിച്ച് ഡോക്ടർ, യുവാവിന്റെ ആരോ​ഗ്യനില തൃപ്തികരം

കോട്ടയം: കോട്ടയം ഏറ്റുമാനൂരിൽ വച്ച് ​ഗുരുവായൂർ-മധുര എക്സ്പ്രസ് ട്രെയിനിൽ നിന്ന് യുവാവിന് പാമ്പുകടിയേറ്റു. എലിയാണെന്ന് കടിച്ചതെന്ന് സംശയിച്ചിരുന്നെങ്കിലും പാമ്പ് കടിയേറ്റതായി ഡോക്ടർമാർ സ്ഥിരീകരിച്ചു. കോട്ടയം മെഡിക്കൽ കോളേജ് ആശുപത്രിയിലെ ഡോക്ടർമാരാണ് യുവാവിന് പാമ്പുകടിയേറ്റതായി സ്ഥിരീകരിച്ചത്.

മധുര സ്വദേശി കാർത്തിക്കിനാണ് പാമ്പ് കടിയേറ്റത്. ഗുരുവായൂർ-മധുര എക്സ്പ്രസിലെ ഏഴാം നമ്പർ ബോ​ഗിയിലാണ് ഇയാൾ യാത്ര ചെയ്തിരുന്നത്. പാമ്പ് കടിയേറ്റതായി കാർത്തിക് പറഞ്ഞു. പാമ്പിനെ കണ്ടതായും കാർത്തിക്കും സഹയാത്രികരും പറഞ്ഞു. എന്നാൽ, എലി കടിച്ചതാകാനാണ് സാധ്യതയെന്നാണ് റെയിൽവേ പോലീസ് ഉദ്യോ​ഗസ്ഥർ പറഞ്ഞത്.

തുടർന്ന്, ഇയാളെ കോട്ടയം മെഡിക്കൽ കോളേജ് ആശുപത്രിയിൽ ചികിത്സയിൽ പ്രവേശിപ്പിച്ചു. ഏഴാം നമ്പർ ബോ​ഗിയിലെ യാത്രക്കാരെ ഒഴിപ്പിച്ച് ബോ​ഗി സീൽ ചെയ്തശേഷമാണ് ട്രെയിൻ യാത്ര തുടർന്നത്. എന്നാൽ, ബോ​ഗിയിൽ പരിശോധന നടത്തിയെങ്കിലും പാമ്പിനെ കണ്ടെത്താൻ സാധിച്ചില്ല.

ട്രെയിൻ നിർത്തിയിട്ടപ്പോൾ കാടുപിടിച്ചുകിടക്കുന്ന പ്രദേശത്താണ് ഏഴാം നമ്പർ ബോ​ഗിയുണ്ടായിരുന്നത്. ഇവിടെ നിന്നാണ് പാമ്പ് ട്രെയിനിൽ കയറിയതെന്നാണ് സംശയിക്കുന്നത്. യുവാവിന്റെ സഹയാത്രികരും പാമ്പിനെ കണ്ടതായി സ്ഥിരീകരിച്ചു. ഏറ്റുമാനൂരിൽ ട്രെയിൻ നിർത്തിയിട്ടിരുന്ന സമയത്താണ് കാർത്തിക്കിന് കാലിൽ കടിയേറ്റത്.

പാമ്പ് ഇഴഞ്ഞ് പോകുന്നതും കാർത്തിക്ക് കണ്ടിരുന്നു. കാലിൽ കടിയേറ്റ ഭാ​ഗത്ത് നിന്ന് രക്തം വരുന്നുണ്ടായിരുന്നുവെന്ന് സഹയാത്രികർ പറഞ്ഞു. ട്രെയിനിലുണ്ടായിരുന്ന ചെറിയ ഹോൾ വഴി പാമ്പ് അകത്ത് കയറിയിരിക്കാമെന്നാണ് നി​ഗമനം.