Actor Premkumar: നടന്‍ പ്രേം കുമാറിന് ചലച്ചിത്ര അക്കാദമി ചെയർമാന്റെ താൽക്കാലിക ചുമതല

തിരുവനന്തപുരം: നടൻ പ്രേം കുമാറിന് കേരള ചലച്ചിത്ര അക്കാദമി ചെയർമാന്റെ താൽക്കാലിക ചുമതല. നിലവിൽ അക്കാദമി വൈസ് ചെയർമാനാണ് പ്രേം കുമാർ. സംവിധായകൻ രഞ്ജിത്ത് രാജിവച്ച ഒഴിവിലാണ് പ്രേം കുമാറിനെ ചെയർമാൻ സ്ഥാനത്തേക്ക് താൽക്കാലികമായി നിയമിച്ചത്.

മുതിർന്ന സംവിധായകൻ ഷാജി എൻ കരുണിന്റെ പേര് ചലച്ചിത്ര അക്കാദമി ചെയർമാൻ സ്ഥാനത്തേക്ക് പരി​ഗണിച്ചിരുന്നെങ്കിലും ബീന പോളിനെ ചെയർപേഴ്സൺ ആക്കണമെന്ന ആവശ്യവുമായി ഡബ്ല്യുസിസി രം​ഗത്തെത്തിയിരുന്നു. ഇതിന് പിന്നാലെയാണ് വൈസ് ചെയർമാനായ പ്രേം കുമാറിന് ചുമതല നൽകി സർക്കാർ പ്രശ്ന പരിഹാരം കണ്ടത്.

സിനിമ കോൺക്ലേവ്, സംസ്ഥാന ചലച്ചിത്ര പുരസ്കാര വിതരണം, ഐഎഫ്എഫ്കെ ഉൾപ്പെടെയുള്ള ദൗത്യങ്ങളാണ് പ്രേം കുമാറിന് മുന്നിലുള്ളത്. സംസ്ഥാന ചലച്ചിത്ര അക്കാദമിയുടെ ചെയർമാനായി ആദ്യമായാണ് സംവിധായകൻ അല്ലാത്ത ഒരാൾ വരുന്നത്. ബം​ഗാളി നടിയുടെ ലൈം​ഗികാതിക്രമ പരാതിയെ തുടർന്നാണ് സംവിധായകൻ രഞ്ജിത്ത് രാജിവച്ചത്.

നിവിൻ പോളിക്കെതിരെ പീഡനക്കേസ്; വിദേശത്ത് വച്ച് പീഡിപ്പിച്ചെന്ന് യുവതി, പോലീസ് കേസെടുത്തു

എറണാകുളം: നടൻ നിവിൻ പോളിക്കെതിരെ പീഡനക്കേസ്. കഴിഞ്ഞ നവംബറിൽ ദുബായിൽ വച്ച് പീഡിപ്പിച്ചെന്നാണ് പരാതി. പരാതിയിൽ എറണാകുളം ഊന്നുകൽ പോലീസ് കേസെടുത്തു. എസ്ഐടി സംഘം അന്വേഷണം ഏറ്റെടുക്കും. സിനിമയിൽ അവസരം വാ​ഗ്ദാനം ചെയ്ത് പീഡിപ്പിച്ചെന്നാണ് യുവതി പരാതി നൽകിയിരിക്കുന്നത്.

കേസിൽ ആറാം പ്രതിയാണ് നിവിൻ പോളി. ജാമ്യമില്ലാ വകുപ്പ് പ്രകാരമാണ് കേസെടുത്തിരിക്കുന്നത്. പോലീസ് കേസ് രജിസ്റ്റർ ചെയ്ത് യുവതിയുടെ മൊഴി രേഖപ്പെടുത്തി. അതേസമയം, യുവതി നിവിൻ പോളിക്കെതിരെ ഒരു മാസം മുൻപ് നൽകിയ പരാതിയിൽ പീഡന ആരോപണമില്ല.

നിവിൻ പോളിയും കൂട്ടരും മർദ്ദിച്ചുവെന്നായിരുന്നു ഒരു മാസം മുൻപ് പരാതി നൽകിയത്. പോലീസിന്റെ പ്രാഥമിക അന്വേഷണത്തിൽ പൊരുത്തക്കേടുകൾ കണ്ടെത്തി. ആശുപത്രി രേഖകൾ ഹാജരാക്കാനും യുവതിക്ക് കഴിഞ്ഞില്ലെന്ന് പോലീസ് വ്യക്തമാക്കുന്നു.