Parallel Intelligence Team: അജിത്‌കുമാറിന്റെ സമാന്തര ഇന്റലിജൻസ് പിരിച്ചുവിട്ട് പുതിയ മേധാവി; ഉദ്യോഗസ്ഥരെ മാതൃ യൂണിറ്റിലേക്ക് മടക്കി!

തിരുവനന്തപുരം: ഡിജിപി അറിയാതെ 4 മാസം മുൻപ് അന്നത്തെ ക്രമസമാധാന ചുമതലയുള്ള എഡിജിപി എം.ആർ. അജിത്കുമാർ പോലീസിൽ തുടങ്ങിവെച്ച സമാന്തര ഇന്റലിജൻസ് സംവിധാനം പിരിച്ചുവിട്ട് പുതിയ മേധാവി മനോജ് ഏബ്രഹാം. സ്റ്റേറ്റ് സ്പെഷൽ ബ്രാഞ്ചും ജില്ലാ സ്പെഷൽ ബ്രാഞ്ചും നിലവിലുള്ളപ്പോഴാണു എഡിജിപിക്ക് വിവരങ്ങൾ റിപ്പോർട്ട് ചെയ്യാൻ 40 പേരെ അജിത്‌കുമാർ നോഡൽ ഓഫിസർമാരായി നിയമിച്ചത്. 

ജില്ലാ കമാൻഡ് സെന്ററുകളിൽ നിന്നും വിവരങ്ങൾ എഡിജിപിയുടെ ഓഫിസിലെ കൺട്രോൾ റൂമിൽ അറിയിക്കാനായിരുന്നു ഉത്തരവ്.  എസ്പിമാരുടെയും കമ്മിഷണർമാരുടെയും ഓഫിസുകളിലാണു നോഡൽ ഓഫിസർമാരെ നിയമിച്ചതെങ്കിലും ഇവരുടെമേൽ അവർക്ക് അധികാരമുണ്ടായിരുന്നില്ല. ഇവർ എഡിജിപിയുടെ നേരിട്ടുള്ള നിയന്ത്രണത്തിലായിരുന്നു. 

40 പേരിൽ 10 പേർ എസ്ഐമാരും 5 പേർ എഎസ്ഐമാരും ബാക്കിയുള്ളവർ സീനിയർ സിവിൽ പോലീസ് ഓഫിസർമാരുമായിരുന്നു.
സർക്കാരിന്റെ രാഷ്ട്രീയ എതിരാളികളെയും ചില പോലീസ് ഉദ്യോഗസ്ഥരെയും രഹസ്യമായി നിരീക്ഷിക്കാനാണ് ഈ സംവിധാനമെന്ന ആക്ഷേപം നേരത്തെ ഉയർന്നിരുന്നു. 

ഇപ്പോഴിതാ ആ 40 പേരോടും അടിയന്തരമായി മാതൃയൂണിറ്റുകളിൽ പോയി റിപ്പോർട്ട് ചെയ്യാൻ മനോജ് ഏബ്രഹാം നിർദേശിക്കുകയുംമത്തുടർന്ന് എല്ലാവരും മടങ്ങി എന്നുമാണ് റിപ്പോർട്ട്. സമാന്തര ഇന്റലിജൻസിനെതിരെ സംസ്ഥാന പോലീസ് മേധാവി എസ്.ദർവേഷ് സാഹിബ് കടുത്ത പ്രതിഷേധം സർക്കാരിനെ അറിയിച്ചിരുന്നു.