ADM Naveen Babu Death: ദിവ്യ പല കേസുകളിലും പ്രതി; യോഗത്തിനെത്തിയത് ആസൂത്രണം ചെയ്താണെന്നും റിമാൻഡ് റിപ്പോർട്ട്

കണ്ണൂർ: എഡിഎം നവീൻ ബാബുവിന്റെ മരണത്തിൽ അറസ്റ്റിലായ പി.പി ദിവ്യക്കെതിരെ ഗുരുതര ആരോപണവുമായി റിമാൻഡ് റിപ്പോർട്ട്. മുൻപ് പല കേസുകളിലും ദിവ്യ പ്രതിയായിട്ടുണ്ട്. കലക്ടറും സംഘാടകരും പരിപാടിയിലേക്ക് ക്ഷണിച്ചിട്ടില്ലെന്നും യോഗത്തിലേക്ക് ദിവ്യ എത്തിയത് ആസൂത്രണം ചെയ്താണെന്നും റിമാൻഡ് റിപ്പോർട്ടിൽ പറയുന്നു. യോഗത്തിനെത്തിയത് കരുതിക്കൂട്ടി അപമാനിക്കാനെന്നും പ്രത്യാഘാതം അറിയാമെന്ന് ഭീഷണി സ്വരത്തിൽ പറഞ്ഞുവെന്നും റിപ്പോർട്ടിലുണ്ട്. 

ഉപഹാര വിതരണത്തിൽ പങ്കെടുക്കാത്തത് ക്ഷണിച്ചിട്ടില്ലെന്നതിന് തെളിവാണ്. പ്രസം​ഗം ചിത്രീകരിക്കാൻ മാധ്യമ പ്രവർത്തകരെ ഏർപ്പാടാക്കിയത് ദിവ്യയാണ്. കലക്ടറും സംഘാടകരും ദിവ്യയെ ക്ഷണിച്ചിട്ടില്ലായിരുന്നുവെന്നും കളക്ടറേറ്റ് ഇൻസ്പെക്ഷൻ വിങ്ങിലെ സീനിയർ റിപ്പോർട്ടറുടെ മൊഴിയുണ്ട്. പ്രസം​ഗത്തിന്റെ ദൃശ്യങ്ങൾ സമൂഹ മാധ്യമങ്ങളിലൂടെ പ്രചരിപ്പിച്ചത് എഡിഎമ്മിന് മനോവിഷമമുണ്ടാക്കി. കുറ്റവാസനയോടും ആസൂത്രണ മനോഭാവത്തോടും കൂടി കുറ്റകൃത്യം നേരിട്ട് നടപ്പിൽ വരുത്തി. ക്രിമിനൽ മനോഭാവം വെളിവായിട്ടുണ്ടെന്ന് റിമാൻഡ് റിപ്പോർട്ടിൽ പറയുന്നു.