PP Divya Police Custody: എഡിഎം നവീൻ ബാബുവിന്റെ മരണം; പിപി ദിവ്യ കസ്റ്റഡിയിൽ, ഒളിച്ച് കളി തുടർന്ന് പൊലീസ്

എഡിഎം നവീൻ ബാബുവന്റെ ആത്മഹത്യയിൽ പ്രതി ചേർക്കപ്പെട്ട പിപി ദിവ്യ പൊലീസ് കസ്റ്റഡിയിൽ. കണ്ണപുരം പോലീസ് ആണ് ദിവ്യയെ കസ്റ്റഡിയിലെടുത്തത്. പ്രതിയെ കസ്റ്റഡിയിലെടുത്തുവെന്ന് കണ്ണൂ‍‍ർ ജില്ലാ പൊലീസ് മേധാവി സ്ഥിരീകരിച്ചു. എന്നാൽ എവിടെ വെച്ചാണ് അറസ്റ്റ് ചെയ്തതെന്നടക്കം മറ്റ് വിവരങ്ങൾ പുറത്തുവിട്ടില്ല.

കണ്ണപുരത്ത് വെച്ച് കാർ യാത്രക്കിടെ കസ്റ്റഡിയിലെടുത്തെന്നാണ് വിവരം. കസ്റ്റഡിയിലെടുത്ത ദിവ്യയെ പൊലീസ് ചോദ്യം ചെയ്തുവരികയാണ്. 

ദിവ്യ നിരന്തരം പൊലീസ് നിരീക്ഷണത്തിലായിരുന്നുവെന്നും ജാമ്യപേക്ഷ കോടതിയുടെ പരിധിയിലായിരുന്നത് കൊണ്ടാണ് അറസ്റ്റ് വൈകിയതെന്നും പൊലീസ് മേധാവി പറഞ്ഞു.  പൊലീസ് റിപ്പോർട്ടിലുള്ള കാര്യങ്ങളാണ് പ്രോസിക്യൂഷൻ കോടതിയിൽ പറഞ്ഞത്. ഇത് പരിഗണിച്ചാണ് മുൻകൂർ ജാമ്യം തള്ളിയതെന്നും കമ്മീഷണർ കൂട്ടിച്ചേർത്തു. ചോദ്യം ചെയ്യലിന് ശേഷമേ തുടർനടപടി സ്വീകരിക്കൂവെന്നും അദ്ദേഹം വ്യക്തമാക്കി.

ദിവ്യയുടെ കസ്റ്റഡി ആശ്വാസകരമെന്ന് നവീന്റെ ഭാര്യ മഞ്ജുഷ പറഞ്ഞു. പൊലീസിൽ വിശ്വാസമുണ്ടെന്നും അന്വേഷണം കാര്യക്ഷമമായി നടക്കുമെന്ന് പ്രതീക്ഷിക്കുന്നതായും മഞ്ജുഷ പറഞ്ഞു.