Road Collapsed: ടാറിംഗ് കഴിഞ്ഞതിന് പിന്നാലെ റോഡ് തകർന്നു; ഉദ്യോഗസ്ഥരെ സ്ഥലം മാറ്റി, കരാറുകാരൻറെ ലൈസൻസ് റദ്ദാക്കാനും തീരുമാനം

കോഴിക്കോട്: കൂളിമാട് -എരഞ്ഞിമാവ് റോഡ് ടാറിം​ഗ് കഴിഞ്ഞ് ഉടൻ തന്നെ തകർന്ന സംഭവത്തിൽ നടപടിയുമായി മന്ത്രി മുഹമ്മദ് റിയാസ്. സംഭവത്തിൽ വീഴ്ച വരുത്തിയ പിഡബ്ല്യുഡി ഉദ്യോഗസ്ഥർക്കെതിരെ വകുപ്പ് തല നടപടി സ്വീകരിക്കാൻ ഉത്തരവിട്ടു. അസിസ്റ്റൻറ് എൻജിനീയറെയും ഓവർസീയറെയും സ്ഥലം മാറ്റാനാണ് തീരുമാനം. മന്ത്രി മുഹമ്മദ് റിയാസിൻറെ നിർദ്ദേശാനുസരണമാണ് ഉദ്യോഗസ്ഥർക്കെതിരെ നടപടിയെടുത്തത്.

ടാറിംഗ് കഴിഞ്ഞയുടൻ റോഡ് തകർന്ന സംഭവത്തിൽ ഉദ്യോ​ഗസ്ഥർക്കെതിരെയും കരാറുകാരനെതിരെയും നടപടിയെടുക്കാനാണ് തീരുമാനം. കരാറുകാരൻറെ ലൈസൻസ് റദ്ദാക്കാൻ തീരുമാനിച്ചു. ആറ് മാസത്തേക്കാണ് ലൈസൻസ് റദ്ദാക്കുക. കോഴിക്കോട് കൂളിമാട് -എരഞ്ഞിമാവ് റൂട്ടിലെ 110 മീറ്റർ റോഡാണ് ടാറിംഗ് കഴിഞ്ഞതിന് പിന്നാലെ തകർന്നത്.

കരാറുകാരൻ സ്വന്തം ചെലവിൽ റോഡിന്റെ അറ്റകുറ്റപ്പണി നടത്തണമെന്നും നിർദേശം നൽകിയിട്ടുണ്ട്. ആവശ്യമായ ക്ലീനിങ് നടത്താതെ ടാർ ചെയ്തതാണ് ടാറിം​ഗ് കഴിഞ്ഞ ഉടൻ റോഡ് തകരാൻ കാരണമെന്ന് വിജിലൻസ് റിപ്പോർട്ടിൽ വ്യക്തമാക്കിയിരുന്നു. ഇതിന് പിന്നാലെയാണ് ഉദ്യോ​ഗസ്ഥർക്കെതിരെ നടപടി സ്വീകരിച്ചത്.