Death: വയോധികയെ പഞ്ചായത്ത് കിണറ്റിൽ മരിച്ച നിലയിൽ കണ്ടെത്തി

പത്തനാപുരം: വിളക്കുടിയിൽ പഞ്ചായത്ത് കിണറ്റിൽ വയോധികയെ മരിച്ച നിലയിൽ കണ്ടെത്തി. കുന്നിക്കോട് തേക്കുംമുകൾ കൃഷ്ണവിലാസത്തിൽ പരേതനായ കൃഷ്ണൻകുട്ടിയുടെ ഭാര്യ  രുഗ്മിണിയെയാണ് (60) ഇന്ന് പഞ്ചായത്ത് കിണറ്റിൽ മരിച്ച നിലയിൽ കണ്ടെത്തിയത്. 

കഴിഞ്ഞ ബുധനാഴ്ച (ഒക്ടോബർ 25) മുതൽ രുഗ്മിണിയെ കാണാനില്ലായിരുന്നു. തുടർന്ന് മകൻ സതീഷ് കുമാർ കുന്നിക്കോട് പൊലീസിൽ പരാതി നൽകി അന്വേഷിച്ച് വരുന്നതിനിടെയാണ് ഇന്ന് രാവിലെ കിണറ്റിൽ മകൻ തന്നെ മൃതദേഹം ആദ്യം കണ്ടത്.

മൃതദേഹത്തിന് ദിവസങ്ങളുടെ പഴക്കമുള്ളതായി കണക്കാക്കുന്നു. ആശാരിപ്പണി ചെയ്യുന്ന മകന്റെ കൂടെയായിരുന്നു രുഗ്മിണി താമസിച്ചത്. ഹോംനേഴ്‌സായി ജോലി ചെയ്യുന്ന മകന്റെ ഭാര്യ ചിലപ്പോൾ മാത്രമാണ് വീട്ടിൽ വരുന്നത്. രുഗ്മിണി കുന്നിക്കോടുളള കടകളിൽ ചെറു ജോലികൾ ചെയ്ത് വരികയായിരുന്നു. മകൾ സരിത ഗുജറാത്തിൽ നഴ്‌സാണ്. 

പ്രാഥമിക അന്വേഷണത്തിൽ അസ്വാഭാവികത ഒന്നും കണ്ടെത്താൻ കഴിഞ്ഞില്ലെങ്കിലും കൂടുതൽ അന്വേഷണത്തിന് ശേഷം മാത്രമേ കൂടുതൽ വിവരം പറയാൻ കഴിയൂ എന്ന് കുന്നിക്കോട് പൊലീസ് അറിയിച്ചു. ഇൻക്വസ്റ്റ് നടപടികൾക്ക് ശേഷം പോസ്റ്റുമോർട്ടത്തിനായി മൃതദേഹം പാരിപ്പളളി മെഡിക്കൽ കോളേജ് ആശുപത്രിയിലേക്ക് കൊണ്ടുപോയി.