Medicine: കോഴിക്കോട് മെഡിക്കൽ കോളേജില്‍ മരുന്ന് ക്ഷാമം; വിതരണക്കാർ സമരത്തിൽ, ഡയാലിസിസ് ഉൾപ്പെടെ പ്രതിസന്ധിയില്‍

കോഴിക്കോട്: കോഴിക്കോട് മെഡിക്കൽ കോളേജിൽ മരുന്ന് ക്ഷാമം രൂക്ഷം. മരുന്നും ശസ്ത്രക്രിയക്ക് ആവശ്യമായ വസ്തുക്കളും ഇല്ലാത്തത് രോ​ഗികളെ ബുദ്ധിമുട്ടിലാക്കുന്നു. മരുന്നുകളും ഡയാലിസിസിന് ഉൾപ്പെടെയുള്ള വസ്തുക്കളും പുറത്ത് നിന്ന് വില കൊടുത്ത് വാങ്ങേണ്ട അവസ്ഥയിലാണ് രോ​ഗികൾ.

മരുന്നും സർജിക്കൽ വസ്തുക്കളും വിൽക്കുന്നത് വിതരണക്കാർ നിർത്തിയതാണ് പ്രതിസന്ധിയിലേക്ക് നയിച്ചത്. അഞ്ച് ദിവസമായി വിതരണക്കാർ സമരത്തിലാണ്. 75 കോടി രൂപ കുടിശികയായതോടെയാണ് വിതരണക്കാർ മരുന്നും സർജിക്കൽ ഉപകരണങ്ങളും നൽകുന്നത് നിർത്തിവച്ചത്. ഒരാഴ്ചയായി പ്രതിസന്ധി തുടരുകയാണെങ്കിലും ഇപ്പോൾ സ്ഥിതി രൂക്ഷമായിരിക്കുകയാണ്.

ബദൽ ക്രമീകരണങ്ങൾ ആരോ​ഗ്യവകുപ്പിന്റെ ഭാ​ഗത്തുനിന്ന് ഉണ്ടാകുന്നില്ലെന്നാണ് ആരോപണം. ഫണ്ട് ലഭിച്ചാൽ ഉടൻ തന്നെ വിതരണക്കാർക്ക് പണം നൽകുമെന്നാണ് ആശുപത്രി അധികൃതർ അറിയിക്കുന്നത്. ഡയാലിസിസ് നടത്തണമെങ്കിൽ ഫിൽറ്ററും ട്യൂബും മരുന്നും ഉൾപ്പെടെ പുറത്ത് നിന്ന് വാങ്ങാനാണ് നിർദേശിക്കുന്നത്.