Child Abuse: രണ്ടുവയസ്സുകാരിയുടെ ജനനേന്ദ്രിയത്തിൽ മുറിവേൽപ്പിച്ചു; മൂന്ന് ആയമാർ അറസ്റ്റിൽ

തിരുവനന്തപുരം: ശിശു ക്ഷേമ സമിതിയിൽ കുഞ്ഞിനോട് കൊടും ക്രൂരത. കിടക്കയിൽ മൂത്രമൊഴിച്ചതിന് കുഞ്ഞിന്റെ ജനനേന്ദ്രിയത്തിൽ മുറിവേൽപ്പിച്ചു. സംഭവത്തിൽ മൂന്ന് ആയമാരെ പോക്സോ ചുമത്തി അറസ്റ്റ് ചെയ്തു. 

താത്കാലിക ജീവനക്കാരായ അജിത, മഹേശ്വരി, സിന്ധു എന്നിവരെയാണ് മ്യൂസിയം പൊലീസ് കസ്റ്റഡിയിലെടുത്തത്. കുഞ്ഞിനെ ഉപദ്രവിച്ചതിനും വിവരം മറച്ച് വച്ചതിനുമാണ് കേസ്.

ശിശു ക്ഷേമ സമിതി ജനറൽ സെക്രട്ടറി അരുൺ ​ഗോപിയാണ് പരാതി നൽകിയത്. ആയമാർക്കെതിരെ കർക്കശ നടപടി സ്വീകരിക്കുമെന്ന് അരുൺ ​ഗോപി പറഞ്ഞു. 

ഒറ്റപ്പെട്ട സംഭവമാണിത്. നഖം കൊണ്ട് നുള്ളിയ ഒരു ചെറിയ പാട് മാത്രമാണ് കുട്ടിയുടെ ജനനേന്ദ്രിയത്തിലുള്ളതെന്നും കുറ്റം ചെയ്ത ആയമാര്‍ക്കെതിരെ നടപടി സ്വീകരിച്ചുവെന്നും അരുണ്‍ഗോപി മാധ്യമങ്ങളോട് പറഞ്ഞു. 

സ്ഥാപനത്തിലെ മറ്റൊരു ആയ കുഞ്ഞിനെ കുളിപ്പിക്കുന്ന സമയത്താണ് സ്വകാര്യ ഭാഗത്ത് കുഞ്ഞിന് വേദനയുണ്ടെന്ന കാര്യം മനസ്സിലാക്കിയത്. തുടർന്ന് അധികൃതരെ വിവരം അറിയിച്ചു. തൈക്കാട് കുട്ടികളുടെ ആശുപത്രിയിൽ നടത്തിയ പരിശോധനയിലാണ് ജനനേന്ദ്രിയ ഭാഗത്ത് മുറിവുള്ളതായി കണ്ടെത്തിയത്. 

തുടർന്ന് കുട്ടിയെ പരിചരിച്ച ആയമാരെ ചോദ്യം ചെയ്തതോടെയാണ് കിടക്കയില്‍ മൂത്രമൊഴിച്ചതിന് കുട്ടിയെ ഉപദ്രവിച്ച വിവരം പുറത്തറിഞ്ഞത്.