Child Abuse: രണ്ടരവയസ്സുകാരിക്ക് നേരെ ആയമാരുടെ ക്രൂരത; ശിശുക്ഷേമ സമിതിയിലെ മുഴുവൻ കുഞ്ഞുങ്ങൾക്കും അടിയന്തിര വൈദ്യ പരിശോധന

തിരുവനന്തപുരം: സംസ്ഥാന ശിശുക്ഷേമ സമിതിയിലെ മുഴുവൻ കുഞ്ഞുങ്ങൾക്കും അടിയന്തിര വൈദ്യ പരിശോധന നടത്തും. കഴിഞ്ഞ ദിവസം രണ്ടര വയസ്സുകാരിക്ക് നേരെയുണ്ടായ ക്രൂരതയുടെ പശ്ചാത്തലത്തിലാണ് തീരുമാനം. പരിശോധനയ്ക്കായ് പ്രത്യേക മെഡിക്കൽ ടീമിനെ നിയോഗിക്കണമെന്നാവശ്യപ്പെട്ട് ജില്ലാ ശിശുക്ഷേമ സമിതി ഇന്ന് ഡിഎംഒക്ക് കത്ത് നൽകും.

മാനസികാരോഗ്യ വിദഗ്ധരെയും ഉൾപ്പെടുത്തിയായിരിക്കും പ്രത്യേക സംഘത്തെ നിയോഗിക്കുക. കുഞ്ഞുങ്ങളെ കൗൺസിലിം​ഗിന് വിധേയരാക്കും. ഇവരുടെ കൗണ്‍സിലിംഗില്‍ ഏതെങ്കിലും തരത്തിലുള്ള പീഡനവിവരം പുറത്ത് വന്നാല്‍ ശക്തമായ നടപടിയെടുക്കാനാണ് തീരുമാനം.

കൃത്യമായ ഇടവേളയില്‍ മോണിറ്ററിംഗ് സമിതിയെ കൊണ്ട് മിന്നല്‍ പരിശോധന നടത്തും. ജീവനക്കാരെ നിയമിക്കുന്ന കാര്യത്തില്‍ ജില്ലാ ശിശുക്ഷേമ സമിതികള്‍ക്ക് ഒരു റോളും ഇല്ലാത്തത് പ്രതിസന്ധി ഉണ്ടാക്കുന്നുണ്ടെന്നാണ് വിദഗ്ധരുടെ അഭിപ്രായം.

കഴിഞ്ഞ ചൊവ്വാഴ്ചയാണ് രണ്ടര വയസ്സുകാരിയുടെ ജനനേന്ദ്രിയത്തിൽ മുറിവേൽപ്പിച്ച സംഭവത്തിൽ ശിശുക്ഷേമ സമിതിയിലെ മൂന്ന് ആയമാരെ അറസ്റ്റ് ചെയ്തത്. കിടക്കയിൽ മൂത്രമൊഴിച്ചതിനായിരുന്നു ആയമാരുടെ ക്രൂരത. താത്കാലിക ജീവനക്കാരായ അജിത, മഹേശ്വരി, സിന്ധു എന്നിവരെയാണ് പോക്സോ ചുമത്തി അറസ്റ്റ് ചെയ്തത്. കുഞ്ഞിനെ ഉപദ്രവിച്ചതിനും വിവരം മറച്ച് വച്ചതിനുമാണ് കേസ്.