ADM Naveen Babu Death: `നവീൻ ബാബുവിന്റെ മരണം അതീവ ദു:ഖകരം, സത്യസന്ധരായ ഉദ്യോഗസ്ഥരെ ചോദ്യം ചെയ്യാൻ അനുവദിക്കില്ല`

കണ്ണൂർ എഡിഎം നവീൻ ബാബുവിന്റെ മരണം അതീവ ദു:ഖകരമെന്ന് മുഖ്യമന്ത്രി പിണറായി വിജയൻ. ഒരു ഉദ്യോ​ഗസ്ഥനും ഇത്തരത്തിലുള്ള ദുരന്തം ഉണ്ടാവാൻ പാടില്ലെന്നും ഇത്തരം കാര്യങ്ങൾ ആവർത്തിക്കാതിരിക്കാനുള്ള ശക്തമായ നടപടി ഉണ്ടാകുമെന്നും അദ്ദേഹം അറിയിച്ചു.

നവീൻ ബാബുവിന്റെ ആത്മഹത്യ നടന്ന് ഒൻപതാം ദിവസമാണ് മുഖ്യമന്ത്രി പ്രതികരിച്ചത്. നവീൻ ബാബുവിന്റെ മരണത്തിൽ പിപി ദിവ്യക്കെതിരെ നടപടി ഉണ്ടാകുമെന്ന് പരോക്ഷമായി സൂചിപ്പിച്ച് കൊണ്ടായിരുന്നു പ്രതികരണം. 

'ഈയടുത്ത കാലത്ത് നമ്മുടെ സര്‍വീസിലുണ്ടായിരുന്ന ഒരാളുടെ കാര്യം നാട് പ്രത്യേകമായി ശ്രദ്ധിക്കുന്ന ഘട്ടമാണിത്. കണ്ണൂര്‍ എ.ഡി.എമ്മായിരുന്ന നവീന്‍ ബാബുവിന്റെ മരണം അതീവ ദുഃഖകരമാണ്. സുതാര്യമായും സത്യസന്ധമായും കാര്യക്ഷമമായും തങ്ങൾ കടമകൾ നിർവഹിക്കുന്ന ഒരു ഉ​ദ്യോ​ഗസ്ഥനെയും ചോദ്യം ചെയ്യാൻ ആരെയും അനുവദിക്കില്ല.  ഇത്തരം കാര്യങ്ങൾ ആവർത്തിക്കാതിരിക്കാനുള്ള ശക്തമായ നടപടി ഉണ്ടാകു'മെന്നും അദ്ദേഹം അറിയിച്ചു. സെക്രട്ടറിയേറ്റ് എംപ്ലോയിസ് അസോസിയേഷൻ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

സിവിൽ സർവീസ് രംഗം മെച്ചപ്പെടേണമെന്നും അദ്ദേഹം ഓർമിപ്പിച്ചു. വകുപ്പുകൾക്കിടയിലെ ഫയൽ നീക്കത്തിന് കാലതാമസം ഉണ്ടാകരുത്. തീരുമാനമെടുക്കാതെ ഫയലുകൾ തട്ടിക്കളിക്കരുതെന്നും അദ്ദേഹം പറഞ്ഞു. അർഹത അനുസരിച്ച് സ്ഥലമാറ്റമുണ്ടാകുമെന്നും സ്ഥലമാറ്റം പൂർണമായും ഓൺലൈനാക്കുമെന്നും മുഖ്യമന്ത്രി ഉറപ്പ് നൽകി.