CAA: സിഎഎ; 5 ബഹുജന റാലികളുമായി മുഖ്യമന്ത്രി; ആദ്യ റാലിയ്ക്ക് ഇന്ന് കോഴിക്കോട് തുടക്കം

തിരുവനന്തപുരം: പൗരത്വ ഭേദ​ഗതി നിയമത്തിനെതിരായ അഞ്ച് ബഹുജന റാലികളെ മുഖ്യമന്ത്രി പിണറായി വിജയൻ ഇന്ന് മുതൽ അഭിസംബോധന ചെയ്യും. മതം പൗരത്വത്തിന് അടിസ്ഥാനമാക്കരുത് എന്ന മുദ്രാവാക്യം ഉയർത്തിയാണ് പ്രചരണം. ഇന്ന് കോഴിക്കോട് നടക്കുന്ന പരിപാടിയോടെ സിഎഎയ്ക്ക് എതിരായ സർക്കാരിന്റെ പ്രചാരണ പരിപാടികൾക്ക് തുടക്കമാകും. നാളെ കാസർകോടും 24ന് കണ്ണൂരുമാണ് ബഹുജന റാലികൾ സംഘടിപ്പിക്കുക. 25ന് മലപ്പുറത്തും 27ന് കൊല്ലത്തുമാണ് മുഖ്യമന്ത്രിയുടെ റാലികൾ നടക്കുന്നത്. 

ഭരണഘടനയുടെ അന്തഃസത്തയെ നശിപ്പിക്കുന്ന പൗരത്വ ഭേദഗതി നിയമത്തെ അതിന്റെ ആദ്യ നാളുകൾ തൊട്ട് ശക്തിയുക്തം എതിർത്തവരാണ് കേരള ജനതയെന്ന് മുഖ്യമന്ത്രി പറഞ്ഞു. ജനാധിപത്യ-മതനിരപേക്ഷ ബോധവും പ്രബുദ്ധതയും നെഞ്ചേറ്റി തീവ്രമായ പ്രതിഷേധ സമരങ്ങൾ സംസ്ഥാനമെങ്ങും ഉയർന്നു വരികയുണ്ടായി. ഇപ്പോൾ പൊതുതെരഞ്ഞെടുപ്പ് മുന്നിൽക്കണ്ട് പൗരത്വ ഭേദഗതി നിയമം തിടുക്കപ്പെട്ട് നടപ്പിലാക്കാനുള്ള നടപടികൾ കേന്ദ്രം ആരംഭിച്ചതിനെതിരെയും സംസ്ഥാനത്ത് ജനകീയ പ്രതിഷേധങ്ങൾ സംഘടിപ്പിക്കപ്പെടുകയാണെന്ന് അദ്ദേഹം പറഞ്ഞു. 

മാർച്ച് 22 മുതൽ 27 വരെ കോഴിക്കോട്, കാസർകോട്, കണ്ണൂർ, മലപ്പുറം, കൊല്ലം ജില്ലകളിലായാണ് റാലികൾ സംഘടിപ്പിക്കുന്നത്. ആദ്യ റാലി ഇന്ന് വൈകുന്നേരം 7 മണിക്ക് കോഴിക്കോട് കടപ്പുറത്ത് നടക്കും. മതത്തിന്റെ പേരു പറഞ്ഞു പൗരത്വം നിഷേധിക്കുന്ന ഈ കിരാത നിയമം കേരളത്തിൽ നടപ്പിലാക്കില്ലെന്നത് എൽഡിഎഫ് സർക്കാരിന്റെ ഉറച്ച നിലപാടാണെന്നും ഈ നിലപാട് ഉയർത്തിപ്പിടിച്ചുകൊണ്ട് ഒരുമിച്ച് നമുക്ക് മതനിരപേക്ഷ -ജനാധിപത്യ ഇന്ത്യക്കായി അണിചേരാമെന്നും മുഖ്യമന്ത്രി ആഹ്വാനം ചെയ്തു.