Cyclone: വർക്കല ചിലക്കൂരിൽ ചുഴലിക്കാറ്റ്; 50 ഓളം വീടുകൾക്ക് നാശം

തിരുവനന്തപുരം: വർക്കല ചിലക്കൂരിൽ ചുഴലിക്കാറ്റ്. വെട്ടൂർ ഗ്രാമ പഞ്ചായത്ത്‌ ഒന്നാം വാർഡായ ചിലക്കൂർ ഫിഷർമാൻ കോളനിയിലും ചേലക്കര പ്രദേശത്തുമാണ് ഉച്ചയ്ക്ക് 12 മണിയോടെ  ചുഴലിക്കാറ്റ്  വീശിയത്. കടൽ തീരത്ത് രൂപം കൊണ്ട ചുഴലിക്കാറ്റ് കുന്നിൻ മുകളിലേക്ക് ഉയരുകയായിരുന്നു. വൻ നാശനഷ്ടമാണ് കണക്കാക്കുന്നത്. 

40 ഓളം വീടുകളാണ് ഫിഷർമാൻ കോളനിയിൽ ഉള്ളത്. 30 ൽ അധികം വീടുകൾ ചേലക്കര ഭാഗത്തും ഉണ്ട്. രണ്ടിടങ്ങളിലുമായി 70ൽ പരം വീടുകളിൽ 50 ഓളം വീടുകളിൽ നാശം സംഭവിച്ചിട്ടുണ്ട്. മത്സ്യത്തൊഴിലാളികൾ താമസിക്കുന്ന സ്ഥലം കൂടിയാണിത്. ഷീറ്റ് പാകിയ വീടുകളിൽ പലതും താമസ യോഗ്യമല്ലാതായി മാറി. 

സിമന്റ് ഷീറ്റുകളും തകര ഷീറ്റും പാകിയ ഒട്ടുമിക്ക വീടുകളുടെയും മേൽക്കൂര തകർന്നിട്ടുണ്ട്. വീടുകൾക്ക് വിള്ളൽ വീണു. ശക്തമായ കാറ്റിൽ വീടുകളുടെ ജനൽ ഗ്ലാസുകൾ തകർന്നു. പ്രദേശത്തെ പ്ലാവ്, മാവ്, തേക്ക്, പുളി തുടങ്ങിയ വൃക്ഷങ്ങൾ കടപുഴകി വീണു. പാകം ചെയ്തു വെച്ചിരുന്ന ആഹാരം ഉപയോഗിക്കാൻ കഴിയാത്ത വിധത്തിലായി. ഇലക്രോണിക് സാധനങ്ങൾ നശിച്ചു. കൂടാതെ 10 ഓളം പോസ്റ്റുകൾ ഒടിഞ്ഞു വീണിട്ടുണ്ട്. പ്രദേശത്തെ വൈദ്യുതി വിതരണം പൂർണ്ണമായും നിലച്ചു. വില്ലേജ്, താലൂക്ക് അധികൃതർ സ്ഥലത്തെത്തി വിവരങ്ങൾ ശേഖരിച്ചു. ഫയർ ഫോഴ്സ് സ്ഥലത്തെത്തി മരങ്ങൾ മുറിച്ചു മാറ്റുന്ന ജോലികൾ പുരോ​ഗമിക്കുകയാണ്. 

ഇടറോഡുകളിൽ മരം വീണ് ഗതാഗതം തടസ്സപ്പെട്ട നിലയിലാണ്. നാട്ടുകാർ തന്നെയാണ് മരങ്ങൾ ആദ്യഘട്ടത്തിൽ മുറിച്ചു മാറ്റിയത്. തൊഴിലുറപ്പ് ജോലിക്ക് മിക്ക കുടുബങ്ങളിലെയും സ്ത്രീകൾ പോയിരുന്നതിനാൽ വീടുകളിൽ ആളുകൾ കുറവായിരുന്നു. ആളപായം ഉണ്ടായില്ല എന്നതാണ് ആശ്വസിക്കാൻ ഇട നൽകുന്നത്. അടിയന്തര സർക്കാർ സഹായം ലഭ്യമാക്കേണ്ട സ്ഥിതി വിശേഷം നിലവിലുണ്ട്.