Dead Rat In Cumin Soda: ജീരകസോഡയിൽ ചത്ത എലി; കുടിച്ച യുവാവിന് ദേഹാസ്വാസ്ഥ്യം

കോഴിക്കോട്: തട്ടുകടയിൽ നിന്ന് വാങ്ങിയ ജീരക സോഡയിൽ ചത്ത എലിയെ കണ്ടത്തതായി റിപ്പോർട്ട്. മുക്കംകടവ് പാലത്തിന് സമീപമുള്ള തട്ടുകടയിൽനിന്നു വാങ്ങിയ ജീരക സോഡയിലാണ് ചത്ത എലിയെ കണ്ടെത്തിയത്. സോഡ കുടിച്ച യുവാവ് ദേഹാസ്വാസ്ഥ്യത്തെ തുടർന്ന് ചികിത്സ തേടിയിരിക്കുകയാണ്. സംഭവം നടന്നത് ഞായറാഴ്ച രാത്രിയാണ്. 

മുക്കം മുത്തേരി സ്വദേശി വിനായകനാണ് തട്ടുകടയിൽനിന്ന് വാങ്ങിയ ജീരക സോഡയിലാണ് ചത്ത എലിയെ കണ്ടെത്തിയത്.  സോഡ കുടിക്കവേ രുചിവ്യത്യാസവും ദുർഗന്ധവും അനുഭവപ്പെടുകയായിരുന്നുവെന്നും ഇതോടെ കുപ്പി പരിശോധിച്ചപ്പോഴാണ് എലി ചത്തത് കണ്ടതെന്നും തുടർന്ന് വിനായകൻ സുഹൃത്തുക്കളെ വിവരമറിയിച്ചതായാണ് റിപ്പോർട്ട്. തുടർന്ന് ആരോഗ്യവകുപ്പിലും മുക്കം പോലീസിലും പരാതി നൽകിയിട്ടുണ്ട്.

ജീരകസോഡ പൊട്ടിച്ചു നൽകിയെങ്കിലും എലി ശ്രദ്ധയിൽപ്പെട്ടിരുന്നില്ലെന്നും യുവാവ് പറഞ്ഞപ്പോഴാണ് കണ്ടതെന്നും കടയുടമ പറഞ്ഞു.  ആറുമാസമായി ഇതേ കമ്പനിയുടെ സോഡ കടയിൽ വിൽക്കുന്നുണ്ടെന്നും ഇത്തരമൊരു പ്രശ്നം ഇതുവരെ ഉണ്ടായിട്ടില്ലെന്നും കടയുടമ പറഞ്ഞു.