Actor Dileep Shankar Death: അഞ്ച് ദിവസം മുന്നേ എന്നെ വിളിച്ചതല്ലേ, നിനക്ക് എന്താ പറ്റിയെ ദിലീപേ...;വേദനയോടെ സീമ ജി നായർ

അന്തരിച്ച  പ്രശസ്ത സീരിയൽ നടൻ ദിലീപ് ശങ്കറിന് ആദരാഞ്ജലികളർപ്പിച്ച് നടി സീമ.ജി.നായർ. അഞ്ച് ദിവസം മുന്നേ ദിലീപ് തന്നെ വിളിച്ചിരുന്നെന്നും അന്ന് സുഖമില്ലാതിരുന്നതിനാൽ സംസാരിക്കാൻ കഴിഞ്ഞില്ലെന്നും സീമ ഫെയ്സ്ബുക്കിൽ കുറിച്ചു. 

'ആദരാഞ്ജലികൾ 5 ദിവസം മുന്നേ എന്നെ വിളിച്ചതല്ലേ നീ ..അന്ന് തലവേദനയായി കിടന്നതുകൊണ്ടു സംസാരിക്കാൻ പറ്റിയില്ല ..ഇപ്പോൾ ഒരു പത്ര പ്രവർത്തകൻ വിളിച്ചപ്പോളാണ് വിവരം അറിയുന്നത് ..എന്താണ് ദിലീപ് നിനക്ക് പറ്റിയത് ..ഒന്നും പറ്റുന്നില്ലല്ലോ ഈശ്വര,  എന്ത് എഴുതണമെന്നു അറിയില്ല  ആദരാഞ്ജലികൾ' സീമ.ജി.നായരുടെ വാക്കുകൾ.

ഇന്ന് ഉച്ചയ്ക്കാണ് തിരുവനന്തപുരത്തെ സ്വകാര്യ ഹോട്ടലിലാണ് ദിലീപിനെ മരിച്ച നിലയിൽ കണ്ടെത്തിയത്. മരണ കാരണം വ്യക്തമായിട്ടില്ല. മൃതദേഹത്തിന് രണ്ട് ദിവസത്തിലധികം പഴക്കമുണ്ടായിരുന്നതായി പൊലീസ് പറയുന്നു. 

നാല് ദിവസം മുമ്പാണ് ദിലീപ് ശങ്കർ ഹോട്ടലിൽ മുറിയെടുത്തത് എന്നാണ് റിപ്പോർട്ട്. രണ്ട് ദിവസമായി അദ്ദേഹം മുറി വിട്ട് പുറത്തേക്കൊന്നും പോയിരുന്നില്ലെന്നും പറയുന്നുണ്ട്. 

മരണത്തിൽ അസ്വാഭാവികതയില്ലെന്നാണ് പോലീസിൻ്റെ പ്രാഥമിക വിലയിരുത്തൽ. മുറിക്കുള്ളിൽ ഫൊറൻസിക് സംഘം പരിശോധന നടത്തുമെന്നും കൻ്റോൺമെൻ്റ് എസിപി അറിയിച്ചിട്ടുണ്ട്.