KIIFBI Masala Bond Case: തോമസ് ഐസക്കിന് വീണ്ടും ഇഡിയുടെ നോട്ടീസ്

തിരുവനന്തപുരം: മസാല ബോണ്ട് കേസുമായി ബന്ധപ്പെട്ട് ചോദ്യം ചെയ്യലിനു ഹാജരാകാൻ ആവശ്യപ്പെട്ട് മുൻ മന്ത്രി തോമസ് ഐസക്കിന് വീണ്ടും എൻഫോഴ്സ്മെന്റ് ഡയറക്ടറേറ്റിന്റെ നോട്ടീസ്. നോട്ടീസിൽ ചൊവ്വാഴ്ച ഇഡിയുടെ കൊച്ചി ഓഫിസിൽ ഹാജരാകണമെന്നാണ് നിർദ്ദേശം.  ഒപ്പം ബന്ധപ്പെട്ട രേഖകളും ഹാജരാക്കണമെന്ന് നിർദ്ദേശമുണ്ട്.

മസാല ബോണ്ടുമായി ബന്ധപ്പെട്ടുള്ള ഇഡിയുടെ സമൻസ് ചോദ്യം ചെയ്തു കൊണ്ട് തോമസ് ഐസക് നല്‍കിയ ഹർജിയിൽ ഹൈക്കോടതി ഇഡിക്ക് നോട്ടീസ് അയച്ചിരുന്നു.  നോട്ടീസിൽ ഹർജി ഈ മാസം ഒൻപതിനു പരിഗണിക്കുന്നതിനു മുൻപായി മറുപടി നൽകണമെന്ന നിർദ്ദേശവും നൽകിയിരുന്നു. ഇതിനിടെയാണ് ചൊവ്വാഴ്ച ഹാജരാകാൻ ആവശ്യപ്പെട്ട് പുതിയ നോട്ടീസ് ഇഡി തോമസ് ഐസക്കിന് നൽകിയത്. മുൻപ് പലതവണ തോമസ് ഐസക്കിനോട് ഹാജരാകാൻ ആവശ്യപ്പെട്ട് ഇഡി നോട്ടീസ് അയച്ചിട്ടുണ്ടെങ്കിലും അദ്ദേഹം ഹാജരാകാതെ ഒഴിഞ്ഞു മാറുകയായിരുന്നു. മാത്രമല്ല ഇഡിയുടെ സമൻസ് ചോദ്യം ചെയ്തു കൊണ്ട് തോമസ് ഐസക്  ഹൈക്കോടതിയെ സമീപിക്കുകയും ചെയ്തു. നിയമവിരുദ്ധവും ഏകപക്ഷീയവുമായ സമൻസ് റദ്ദാക്കണമെന്നായിരുന്നു അദ്ദേഹം കോടതിയിൽ ആവശ്യപ്പെട്ടത്.

ഇതിനു മുൻപും ഇഡി അയച്ച സമൻസിനെതിരെ തോമസ് ഐസക്കും കിഫ്ബിയും ഹൈക്കോടതിയെ സമീപിച്ചിരുന്നു. തുടർന്ന് ഇഡി സമൻസ് പിൻവലിച്ചിരുന്നു. എന്നാൽ ആഴ്ചകൾക്കകം വീണ്ടും സമൻസ് അയച്ചിരിക്കുകയാണെന്നു ചൂണ്ടിക്കാട്ടിയാണ് ഇവർ വീണ്ടും കോടതിയിലെത്തിയത്. ഈ ഹർജി പരിഗണിച്ചാണ് ഫെബ്രുവരി ഒൻപതിനകം മറുപടി നൽകാൻ ഹൈക്കോടതി ഇ.ഡിക്കു നോട്ടിസ് അയച്ചത്.