Epidemic: കൊല്ലം ജില്ലയിൽ പകർച്ചവ്യാധികൾ പടരുന്നു; രണ്ടാഴ്ചയ്ക്കിടെ ചികിത്സ തേടിയത് 6,200 പേർ

കൊല്ലം: കൊല്ലം ജില്ലയിൽ പകർച്ചവ്യാധികൾ പടരുന്നു. ഡെങ്കിപ്പനി, എലിപ്പനി, മലേറിയ ഉൾപ്പെടെയുള്ള പകർച്ച വ്യാധികൾ പടരുന്നത് ആശങ്കയ്ക്ക് ഇടയാക്കി. കഴിഞ്ഞ രണ്ടാഴ്ചയ്ക്കിടെ വിവിധ പകർച്ചവ്യാധികൾ ബാധിച്ച് 6,200 പേരാണ് ചികിത്സ തേടിയത്. തീരദേശ മേഖലയിലും പകർച്ചവ്യാധി കേസുകൾ വർധിക്കുകയാണ്. കഴിഞ്ഞ രണ്ടാഴ്ചയ്ക്കിടെ കൊല്ലം ജില്ലയിൽ പകർച്ചവ്യാധി കേസുകൾ വർധിച്ചു.

വിവിധ പകർച്ചവ്യാധികൾ ബാധിച്ച് 6,200 പേർ കഴിഞ്ഞ രണ്ടാഴ്ചയായി ചികിത്സ തേടി. ഇതിൽ 199 പേർ വിവിധ ആശുപത്രികളിൽ കിടത്തി ചികിത്സയ്ക്ക് വിധേയരായി. 83 പേർ രണ്ടാഴ്ചയക്കുള്ളിൽ ഡെങ്കിപ്പനി ബാധിച്ച് ചികിത്സതേടി. എച്ച് വൺ എൻ വൺ, മലേറിയ, മലമ്പനി, എലിപ്പനി, ഡെങ്കി, ചിക്കൻപോകസ് എന്നീ രോഗങ്ങളും ഇതിനോടകം ജില്ലയിൽ റിപ്പോർട്ട് ചെയ്തിട്ടുണ്ട്.

ജില്ലയിൽ 11 പേർക്കാണ് എലിപ്പനി സ്ഥിരീകരിച്ചത്. കോർപ്പറേഷൻ പരിധിയിലാണ് അനിയന്ത്രിതമായി രോഗികളുടെ എണ്ണം വർധിക്കുന്നത്. ഇരവിപുരം, കാക്കത്തോപ്പ്, ശക്തികുളങ്ങര തീരമേഖലയുമായി ബന്ധപ്പെട്ട് കിടക്കുന്ന പ്രദേശങ്ങളിൽ പകർച്ചവ്യാധി കേസുകൾ കൂടിവരികയാണ്.

പകർച്ചവ്യാധികൾ വർധിക്കുന്ന പ്രദേശത്ത് ആരോഗ്യവകുപ്പിന്റെയും കോർപ്പറേഷന്റെയും നേതൃത്വത്തിൽ ശുചീകരണ പ്രവർത്തനങ്ങളും ബോധവത്കരണ പ്രവർത്തനങ്ങളും ഉടൻ ആരംഭിക്കുമെന്ന് അധികൃതർ വ്യക്തമാക്കി.