ADM Naveen Babu Death: എഡിഎം നവീൻ ബാബുവിന്റെ മരണം; സിബിഐ അന്വേഷണം ഇല്ല

കണ്ണൂർ മുൻ എഡിഎം നവീൻ ബാബുവിന്റെ മരണത്തിൽ സിബിഐ അന്വേഷണമില്ല. സിബിഐ അന്വേഷണം ആവശ്യപ്പെട്ട് ഭാര്യ മഞ്ജുഷ നൽകിയ ഹർജി ഹൈക്കോടതി തള്ളി. പ്രത്യേക അന്വേഷണ സംഘം കുടുംബത്തിന്റെ ആശങ്കകൾ കേൾക്കണമെന്നും കോടതി ഉത്തരവിട്ടു.

പ്രത്യേക അന്വേഷണസംഘത്തിന്റെ അന്വേഷണം തുടരും. സ്വതന്ത്രവും നീതിപൂർവകവുമായ അന്വേഷണം നടത്തണമെന്നും കോടതി ഉത്തരവ്. ജസ്റ്റിസ് കൗസർ എടപ്പ​ഗത്താണ് ഹർജിയിൽ വിധി പറഞ്ഞത്. 

കണ്ണൂർ റേഞ്ച് ഡിഐജി അന്വേഷണം മേൽനോട്ടം വഹിക്കണമെന്ന് കോടതി നിർദ്ദേശിച്ചു. പ്രത്യേക അന്വേഷണ സംഘം റിപ്പോർട്ടുകൾ ഡിഐജിക്ക് കൈമാറണം. അന്വേഷണ സംഘം അന്വേഷണത്തിലെ പുരോ​ഗതി ഹർജിക്കാരിയെ അറിയിക്കണം.

ഹർജിയിൽ പറഞ്ഞിരിക്കുന്ന ആരോപണങ്ങൾ എസ് ഐ ടി അന്വേഷിക്കണം. കൊന്ന് കെട്ടിത്തൂക്കിയതാണോയെന്നും എസ് ഐടി പരിശോധിക്കണം. അന്വേഷണത്തിന് ശേഷം ഡ്രാഫ്റ്റ് ഫൈനൽ റിപ്പാർട്ട് ഡിഐജി ക്ക് മുമ്പിൽ നൽകി അപ്രൂവൽ വാങ്ങണമെന്നും കോടതി നിർദ്ദേശിച്ചു. 

അതേസമയം വാദങ്ങൾ പരി​ഗണിച്ചില്ലെന്നും കേസിൽ നിന്ന് പിന്നോട്ടില്ലെന്നും ഭാര്യ മഞ്ജുഷ പ്രതികരിച്ചു. ഹൈക്കോടതി ഡിവിഷൻ ബെഞ്ചിനെ സമീപിക്കുമെന്നും മഞ്ജുഷ പറഞ്ഞു.