ADM Naveen Babu Death: `എനിക്ക് രണ്ട് ഒപ്പുണ്ട്`; നവീൻ ബാബുവിനെതിരെ പരാതി നൽകിയത് താനാണെന്ന് ഉറപ്പിച്ച് പ്രശാന്ത്

മുൻ കണ്ണൂർ എഡിഎം നവീൻ ബാബുവിന്റെ മരണത്തിൽ പരാതിക്കാരൻ പ്രശാന്തിന്റെ മൊഴിയെടുത്ത് അന്വേഷണസംഘം. നവീൻ ബാബുവിനെതിരെ മുഖ്യമന്ത്രിക്ക് പരാതി കൊടുത്തത് താനാണെന്ന് പ്രശാന്ത് സ്ഥിരീകരിച്ചു. പരാതിയിലെ ഒപ്പും ലീസ് എ​ഗ്രിമെന്റിലെ ഒപ്പും തൻ്റേത് തന്നെയെന്നും തനിക്ക് രണ്ട് ഒപ്പുണ്ടെന്നും പ്രശാന്ത് പറഞ്ഞു. 

എഡിഎം നവീൻ ബാബുവിന്റെ മരണത്തിൽ ആദ്യമായാണ് അന്വേഷണസംഘം പ്രശാന്തിന്റെ മൊഴി എടുത്തത്.  പെട്രോൾ പമ്പിന് അംഗീകാരം നൽകുന്നതുമായി ബന്ധപ്പെട്ട് നവീൻ ബാബു 91,500 രൂപ കൈക്കൂലി വാങ്ങിയെന്നായിരുന്നു ടി.വി പ്രശാന്ത് മുഖ്യമന്ത്രിക്ക് അയച്ച കത്തിൽ പറയുന്നത്. 

പെട്രോള്‍ പമ്പിനായുള്ള എൻഒസി ഫയലിലെ പ്രശാന്തന്‍റെ ഒപ്പും പരാതിയിലെ ഒപ്പും വ്യത്യസ്തമായിരുന്നു. എൻഒസി ഫയലിൽ ടിവി പ്രശാന്ത് എന്നാണ് പേര് നൽകിയിരിക്കുന്നത്. എന്നാൽ മുഖ്യമന്ത്രിക്ക് നൽകിയെന്ന് പറയപ്പെടുന്ന പരാതിയിൽ പ്രശാന്തൻ ടിവി എന്നുമാണ് നൽകിയിരിക്കുന്നത്. 

പ്രശാന്തിനെ കേസിന്റെ ഭാ​ഗമാക്കില്ലെന്നായിരുന്നു അന്വേഷണ സംഘം പറഞ്ഞിരുന്നത്. അന്വേഷണം അവസാന ഘട്ടത്തിലാണെന്നും പി.പി ദിവ്യയുടെ പ്രസംഗം മാത്രം കേസിന് അടിസ്ഥാനമാക്കാനാണ് അന്വേഷണ സംഘത്തിന്റെ നീക്കമെന്നുമാണ് വിവരം. അതിനിടെ പി.പി ദിവ്യയ്ക്ക് ജാമ്യം ലഭിച്ചതിൽ ഹൈക്കോടതിയെ സമീപിക്കാനുള്ള ആലോചനയിലാണ് കുടുംബം.