Doctors Boycott School Kalolsavam: കലോത്സവം ബഹിഷ്കരിച്ച് സർക്കാർ ഡോക്ടർമാർ; ഡിഎംഒയ്ക്ക് കത്ത് നല്‍കി

തിരുവനന്തപുരം: 63ാമത് സംസ്ഥാന സ്കൂൾ കലോത്സവം ബഹിഷ്കരിച്ച് സർക്കാർ ഡോക്ടർമാർ. കലോത്സവുമായി സഹകരിക്കില്ലെന്ന് ഡോക്ടർമാർ ഡിഎംഒയ്ക്ക് കത്ത് നൽകി. ആര്യനാട് ആശുപത്രിയിലെ ഡോക്‌ടർക്കെതിരായ നടപടിയിലാണ് പ്രതിഷേധം. 

കലോത്സവവുമായി ബന്ധപ്പെട്ട് നിരവധി ആളുകളാണ് നഗരത്തിൽ തങ്ങുന്നത്. കലോത്സവം നടക്കുന്ന വേദികളിൽ 24 മണിക്കൂറും ഡോക്ടർമാരുടെ സേവനം ആവശ്യമാണ്. ഇതിനിടെയാണ് ഡോക്ടർമാരുടെ നിസ്സഹകരണം. 

ഡ്യൂട്ടിക്ക് ഹാജരാകില്ലെന്നു സർക്കാർ ഡോക്ടർമാരുടെ സംഘടനയായ കേരള ഗവ. മെഡിക്കൽ ഓഫിസേഴ്സ് അസോസിയേഷൻ (കെജിഎംഒഎ) ആരോഗ്യ വകുപ്പിനെ അറിയിച്ചു.

സെപ്റ്റംബർ 23നാണ് സ്വകാര്യ പ്രാക്ടീസ് നടത്തിയതിന്റെ പേരിൽ ആര്യനാട് ആശുപത്രിയിലെ ഡോ.ഡി.നെൽസനെ സസ്പെൻഡ് ചെയ്തത്. തുടർന്ന് നവംബർ 11ന് അടൂർ ജനറൽ ആശുപത്രിയിൽ നിയമിച്ചു. നെൽസനെ ആര്യനാട് തന്നെ നിയമിക്കണമെന്ന ആവശ്യവുമായാണ് ഡോക്ടർമാരുടെ പ്രതിഷേധം. 

അതേസമയം മെഡിക്കൽ കോളജ് ആശുപത്രിയിൽനിന്നും നാഷനൽ ഹെൽത്ത് മിഷനിൽനിന്നും ഡോക്ടർമാരെ നിയമിക്കാനുള്ള ശ്രമത്തിലാണ് ആരോഗ്യവകുപ്പ്.