Idukki Accident: ഇടുക്കിയിൽ തൊഴിലാളികളുമായി പോയ ജീപ്പ് മറിഞ്ഞു; ഒരു മരണം

ഇടുക്കി: പാമ്പനാറിന് സമീപം കൊടുവകോണത്ത് ജീപ്പ് മറിഞ്ഞ് തൊഴിലാളി സ്ത്രീ മരിച്ചു. കൊടുവക്കോണം സ്വദേശി എസ്റ്റർ (55) ആണ് മരിച്ചത്. എസ്റ്റേറ്റിലേക്ക് തൊഴിലാളികളുമായി പോയ ജീപ്പ് മറിഞ്ഞാണ് അപകടമുണ്ടായത്. അപകടത്തിൽ എട്ട് പേർക്ക് പരിക്കേറ്റു. ഇതിൽ അന്യസംസ്ഥാന തൊഴിലാളി ബെൻസറിൻ്റെ പരുക്ക് ഗുരുതരമാണ്. ഇയാളെ കോട്ടയം മെഡിക്കൽ കോളേജിലേക്ക് കൊണ്ടുപോയി. മറ്റുള്ളവരെ പീരുമേട് താലൂക്ക് ആശുപത്രിയിൽ പ്രവേശിപ്പിച്ചു.

Gunda Attack: ഷെയ്ൻ നിഗത്തിന്റെ സിനിമ ലൊക്കേഷനിൽ അക്രമം; പ്രൊഡക്‌ഷൻ മാനേജർക്ക് മർദ്ദനം

കോഴിക്കോട്: ഷെയ്ൻ നിഗം നായകനായ ഹാൽ എന്ന സിനിമയുടെ ഷൂട്ടിങ് ലൊക്കേഷനിൽ ആക്രമണം. സെറ്റിലെത്തിയ അഞ്ചം​ഗ സംഘം പ്രൊഡക്‌ഷൻ മാനേജരെ ക്രൂരമായി മർദിച്ചു. പ്രൊഡക്‌ഷൻ മാനേജർ ടി.ടി.ജിബുവിനാണ് മർദനമേറ്റത്. ഇന്നലെ രാത്രി 11 മണിയോടെയാണ് മലാപ്പറമ്പിന് സമീപം ആക്രമണമുണ്ടായത്.

ജിബു പൊലീസിൽ പരാതി നൽകി. അബു ഹംദാൻ, ഷബീർ എന്നിവരും മറ്റു മൂന്നു പേരും ചേർന്നാണ് മർദിച്ചതെന്നാണ് ജിബു പൊലീസിൽ നൽകിയിരിക്കുന്ന പരാതി. ജിബുവിനെ ഷൂട്ടിങ് ലൊക്കേഷനിൽനിന്ന് വലിച്ചുകൊണ്ടുപോകുകയായിരുന്നു. തുടർന്ന് റോഡരികിൽ വച്ച് മർദിച്ചു. ആക്രമികൾ ജിബുവിനെ ലോഹവള കൊണ്ട് ഇടിക്കുകയും കത്തികൊണ്ട് കുത്തി കൈയ്ക്ക് പരിക്കേൽപ്പിക്കുകയും ചെയ്തു. സംഭവത്തിൽ പൊലീസ് അന്വേഷണം ആരംഭിച്ചു.

ബൈക്ക് വാടകയുമായി ബന്ധപ്പെട്ട തർക്കമാണ് ആക്രമണത്തിന് കാരണമെന്നാണ് ലഭിക്കുന്ന വിവരം. സിനിമയുടെ ആവശ്യത്തിനായി ബൈക്ക് വാടകയ്ക്ക് എടുത്തിരുന്നു. വൻ തുകയാണ് വാടകയായി ചോദിച്ചത്. തുടർന്ന് ഇത്രയും വലിയ തുക നൽകാൻ സാധിക്കില്ലെന്ന് അറിയിച്ചു. ഇതോടെയാണ് അബു ഹംദാന്റെ നേതൃത്വത്തിലെത്തിയ സംഘം മർദിച്ചതെന്ന് ജിബു പറഞ്ഞു. ഷെയ്ൻ നിഗത്തിനെ നായകനാക്കി വീര സംവിധാനം ചെയ്യുന്ന ‘ഹാൽ’ എന്ന ചിത്രത്തിന്റെ ഷൂട്ടിങ് ലൊക്കേഷനിലാണ് ആക്രമണം. വെള്ളിമാട് കുന്നിൽ വെളിച്ചെണ്ണ മില്ലിന് സമീപമാണ് ഷൂട്ട് നടക്കുന്നത്.