Tree Felling Case: വയനാട്ടിലെ അനധികൃത മരംമുറി; രണ്ട് വനംവകുപ്പ് ഉദ്യോഗസ്ഥർക്കെതിരെ നടപടി

വയനാട്: വയനാട് സുഗന്ധഗിരി ചെന്നായ്ക്കവലയിലെ മരംമുറിയിൽ വനംവകുപ്പിലെ രണ്ട് ഉദ്യോഗസ്ഥർക്കെതിരെ നടപടി. കൽപ്പറ്റ ഫോറസ്റ്റ് സെക്ഷൻ ഓഫീസർ കെ.കെ. ചന്ദ്രനെ സസ്പെൻഡ് ചെയ്തു. നോർത്തേൺ സിസിഎഫ് കെ.എസ്. ദീപയാണ് നടപടി സ്വീകരിച്ചത്.

1986 ൽ സുഗന്ധഗിരി കാർഡമം പ്രൊജക്റ്റ് ഭാഗമായി ആദിവാസികൾക്ക് പതിച്ചുകൊടുത്ത മൂവായിരത്തോളം ഏക്കർ ഭൂമിയിലാണ് അമ്പതിലേറെ വൻ മരങ്ങള്‍ മുറിച്ചത്. ഈ സംഭവത്തിലാണ് വനംവകുപ്പിലെ രണ്ടു ഉദ്യോഗസ്ഥരെ  സസ്പെൻഡ് ചെയ്തത്.

വനംവാച്ചർ ആർ. ജോൺസനെതിരെയും നടപടിയുണ്ടാകും. മരംമുറിയുമായി ബന്ധപ്പെട്ട് ഇരുവർക്കും വീഴ്ചയുണ്ടായി എന്ന് കണ്ടെത്തിയതിന് പിന്നാലെയാണ് നടപടി. കൂടുതൽ ഉദ്യോഗസ്ഥർ പങ്കുണ്ടോ എന്ന് അന്വേഷിക്കാനും നോർത്തേൺ സിസിഎഫ് നിർദേശിച്ചു. 1986 ൽ സുഗന്ധഗിരി കാർഡമം പ്രൊജക്റ്റ് ഭാഗമായി പതിച്ചുകൊടുത്ത ഭൂമിയിലാണ് അനധികൃതമായി മരം മുറിച്ചത്.

സംഭവത്തിൽ ആറ് പേർക്കെതിരെ വനംവകുപ്പ് കേസെടുത്തിരുന്നു. അനധികൃതമായി മുറിച്ച് കടത്തിക്കൊണ്ടുപോയ 30 മരങ്ങളുടെ തടികള്‍ വനംവകുപ്പ് നേരത്തെ കണ്ടെടുക്കുകയും തടികൾ കൊണ്ടുപോകാന്‍ ഉപയോഗിച്ച ലോറി പിടിച്ചെടുക്കുകയും ചെയ്തിരുന്നു. അനധികൃത മരംമുറിയെക്കുറിച്ച് അന്വേഷിക്കുന്നതിനായി പ്രത്യേക സംഘത്തെ നിയോഗിച്ചു.