Kerala Police: ഐപിഎസ് തലപ്പത്ത് അഴിച്ചുപണി; ഏഴ് എസ്പിമാർക്കും രണ്ട് കമ്മീഷണർമാർക്കും മാറ്റം

തിരുവനന്തപുരം: സംസ്ഥാനത്ത് ഐപിഎസ് തലപ്പത്ത് അഴിച്ചുപണി. ഏഴ് എസ്പിമാർക്കും രണ്ട് കമ്മീഷണർമാർക്കുമാണ് മാറ്റം. കോട്ടയം, കൊല്ലം, പത്തനംതിട്ട, വയനാട്, കോഴിക്കോട് റൂറൽ, കണ്ണൂർ റൂറൽ, കാസർകോട് എസ്പിമാരെയാണ് സ്ഥലംമാറ്റിയത്. തിരുവനന്തപുരത്തും കൊച്ചിയിലും ഇനി മുതൽ ഐപിഎസ് ഉദ്യോഗസ്ഥരായ രണ്ട് ഡിസിപിമാർ വീതം ഉണ്ടാകും. ലോക്സഭാ തിരഞ്ഞെടുപ്പ് കാലത്ത്  വിവാദമായ കാഫിർ പോസ്റ്റ് വിവാദ കേസ് അന്വേഷിച്ച ഉദ്യോഗസ്ഥർക്കും മാറ്റമുണ്ട്.

കോഴിക്കോട് കമ്മീഷണർ രാജ് പാൽ മീണയെ കണ്ണൂർ റെയ്ഞ്ച് ഡിഐജിയാക്കി. ഡിഐജിയായിരുന്ന തോംസനെ നേരത്തെ മാറ്റിയിരുന്നു. കോഴിക്കോട് റൂറൽ എസ്പി അരവിന്ദ് സുകുമാരനും മാറ്റമുണ്ട്. തോംസണും അരവിന്ദ് സുകുമാറുമായിരുന്നു കാഫിർ സ്ക്രീൻഷോട്ട് കേസ് അന്വേഷിച്ചിരുന്നത്.

അരവിന്ദ് സുകുമാറിനെ എക്കണോമിക് ആൻഡ് ഓഫൻസ് വിഭാഗത്തിലേക്കാണ് മാറ്റിയത്. സിപിഎം ഗ്രൂപ്പുകളിലാണ് കാഫിർ സ്ക്രീൻഷോട്ട് ആദ്യം പ്രത്യക്ഷപ്പെട്ടതെന്ന് അരവിന്ദ് സുകുമാർ റിപ്പോർട്ട് നൽകിയിരുന്നു. ടി നാരയണനാണ് പുതിയ കോഴിക്കോട് കമ്മീഷണർ. തിരുവനന്തപുരം ഡിസിപി ആയിരുന്ന പി നിധിൻ രാജിനെ കോഴിക്കോട് റൂറൽ എസ്.പിയാക്കിയിട്ടുണ്ട്.