VD Satheesan: ചോദ്യങ്ങൾ വെട്ടിമാറ്റി; സ്പീക്കർക്ക് കത്ത് നൽകി പ്രതിപക്ഷ നേതാവ്

വിവാദ വിഷയങ്ങളിലെ ചോദ്യങ്ങൾ വെട്ടിനിരത്തിയതിൽ സ്പീക്കർക്ക് പരാതി നൽകി പ്രതിപക്ഷ നേതാവ് വിഡി സതീശൻ. കേരള നിയമസഭയുടെ പത്രണ്ടാം സമ്മേളനത്തിൽ പ്രതിപക്ഷാം​ഗങ്ങൾ നൽകിയ നക്ഷത്ര ചിഹ്നമിട്ട ചോദ്യങ്ങൾ, നക്ഷത്രചിഹ്നമിടാത്ത ചോദ്യങ്ങളാക്കി മാറ്റിയ നിയമസഭാ സെക്രട്ടറിയറ്റിന്റെ നടപടിക്കെതിരെയാണ് സ്പീക്കർക്ക് കത്ത് നൽകിയത്.

എഡിജിപി- ആർഎസ്എസ് കൂടിക്കാഴ്ച, തൃശ്ശൂർ പൂരം കലക്കൽ, കാഫിർ സ്ക്രീൻ ഷോട്ട് തുടങ്ങി വിവാദ വിഷയങ്ങളടങ്ങിയ  49 ചോദ്യങ്ങളാണ് ചട്ടവിരുദ്ധമായി വെട്ടിമാറ്റിയത്.

നിയമസഭയിൽ നക്ഷത്ര ചിഹ്നമിട്ട ചോദ്യങ്ങൾ, നക്ഷത്ര ചിഹ്നമില്ലാത്ത ചോദ്യങ്ങൾ എന്നിങ്ങനെ രണ്ട് തരം ചോദ്യങ്ങളാണുള്ളത്. ഇവയിൽ നക്ഷത്ര ചിഹ്നമിട്ട ചോദ്യങ്ങൾക്ക് മുഖ്യമന്ത്രിയോ മന്ത്രിമാരോ നേരിട്ട് മറുപടി നൽകണം. ഇത്തരത്തിൽ മുഖ്യമന്ത്രി നേരിട്ട് മറുപടി പറയേണ്ട ചോദ്യങ്ങളാണ് നിയമസഭാ സമ്മേളനത്തിൽ വെട്ടിമാറ്റിയത്.

ഇത് ചട്ടടവിരുദ്ധമെന്ന് ചൂണ്ടികാട്ടിയാണ് പ്രതിപക്ഷ നേതാവ് കത്ത് നൽകിയത്. ഇതിന് ഉത്തരവാദികളായ ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കണമെന്നും പ്രതിപക്ഷാംഗങ്ങളുടെ ചോദ്യ നോട്ടിസുകള്‍ ചട്ടം 38, 39 എന്നിവ പരിശോധിച്ച്  നക്ഷത്ര ചിഹ്നമിട്ട ചോദ്യങ്ങളായി അനുവദിക്കണമെന്നും പ്രതിപക്ഷ നേതാവ് കത്തില്‍ ആവശ്യപ്പെട്ടു.